E campeonato di Arubaanse Voetbal Bond (AVB) 2021-2022 lo ta dedica na Ernst Mohamed, kende ta referee di AVB. A tuma contacto cu su persona pa inform’e cu e campeonato lo ta dedica na su persona y pa esaki e ta contento como tambe a keda humilde. Tambe a sinti honor y privilegio p’esaki.
Kiermen tur loke el a haci pa yuda futbol pa hopi aña como coach, trainer, hungado, dirigente di team y referee, awo por mira cu esey a ‘pay off’. El a cuminsa di chikito hunga den bario y despues su tata a hinc’e den RCA aspirant. Segun Mohamed, el a train hopi aña cu nan pero door di logistica el a bay hunga pa Dakota junioren, cual team a sali subcampeon. Pa dos aña el a hunga den division honor pa Dakota y despues el a bay studia na Merca. Aki tambe el a hunga futbol den un campeonato entre e ciudadnan.
El a regresa Aruba y a sigui hunga futbol. El a yega di organisa zaalvoetbal pa cuater aña largo cu a bira internacional. E tempo ey a hacie como dedicacion na contra abuso di mucha, unda a recauda hopi fondo pa Fundacion Respeta Mi. El a bira presidente di Rooi Afo p’un par di anja, a bay den beroeps commissie y despues straf commissie. El a sali di Rooi Afo y bay hunga den veterano, unda a recult’e como referee.
Mohamed tin 25 aña como referee y a fluit wega tanto local como na Corsou. El a fluit wega den tur division y e parti mas dushi pa su persona ta cu e por aporta na deporte di Aruba. Hopi hende tin miedo of no kier bira referee, pero e no ta algo malo. Despues di 25 aña Mohamed ta bon bon y hasta a haya reconocemento p’e trabou haci.
Pa cobertura mas amplio, lesa e edicion di TREMPAN mañan.
