E decision di Minister Glenbert Croes pa prohibi Departamento di Labor pa tuma peticionnan pa retiro di trahado, ta un ordo inconstitucional. Mescos cu hues a dicta un sentencia den e caso sumario cu Romar Trading a entama contra gobierno, awor Camara di Comercio a sali bisa cu nan tambe tin e mesun pensamento, a informa gobierno di e decision robes aki, pero no a haya oido. Nan ta contento cu hues a corigi e mandatario y a reconoce e derecho di comercio di por restructura negoshinan pa salba cuponan di trabou.
Na varios ocacion, incluyendo via comunicadonan di prensa, Camara di Comercio y Industria (KvK) a vocifera e situacion dificil cu hopi empresa ta pasando aden pa hopi luna caba. E hecho cu actividad comercial en general te ainda no ta suficiente y cu mester economisa riba tur tereno, ta pone un peso adicional riba e companianan. Hopi negoshi ta operando pa varios luna caba cu
reduccion y/of adaptacion di e orario di trabao di su empleadonan pa por logra sobrevivi, pero e situacion aki no ta sostenibel pa mas tempo.
Pa e motibo ey KvK a haci diferente apelacion por escrito na Minister di Labor pa urgi DAO pa acepta e peticionnan di retiro y tambe pa e Comision di Retiro reanuda su actividadnan y consecuentemente por tuma decision. KvK a indica cu e derecho aki ta un derecho fundamental cu ta hancra den nos constitucion y ta duna tur ciudadano e posibilidad di wordo scucha.
Segun stipulacion den e ley “Landsverordening Beëindiging Arbeidsovereenkomsten”, un compania por opta pa entrega un peticion
di retiro di personal cerca e Director di Departamento di Labor (DAO) y e Comision di Retiro (Ontslagcommissie) mester trata e peticionnan aki. Sinembargo, desde maart 2020 DAO no ta aceptando e peticionnan di retiro y e Ontslagcommissie no ta reuniendo tampoco, locual ta en pugna cu e ley y ta viola e derecho di e companianan pa por haci uzo di e intermediacion aki.
KvK ta contento cu Corte di Husticia, por medio di un sentencia di hues, a ratifica cu DAO ta violando e ley constitutonal door di nenga di acepta peticion di retiro, kitando e derecho fundamental di nos empresarionan.
Ta importante pa realisa cu ta necesario y cardinal pa un compania tin e posibilidad di haci un restructuracion di su gastonan y actividadnan pa por tin continuacion di e negoshi na momento cu ingreso reduci significantemente. Durante di e proceso aki ta escencial pa por haci uzo di tur opcion existente segun e necesidad di e negoshi. E meta principal ta pa evita cu ta forsa companianan pa cera e negoshi, ya cu por medio di un restructuracion por mantene un grupo di empleado na trabao en bes cu tur empleado keda sin trabao ora cera e negoshi.
KvK ta señala cu ta hopi importante pa por tin dialogo entre sector priva y gobierno riba diferente punto di preocupacion relaciona cu distanciamento digital y cambionan continuo cu comercio tin cu enfrenta pa garantisa siguridad di e empleado y cliente y na mesun momento sigui relevante den mercado.
Camara di Comercio y Industria Aruba a comparti su pensamento riba e pasonan cu Aruba lo mester tuma pa comercio por sigui avansa. KvK ta spera cu Gobierno lo duna oido na su conseho y cu esaki lo resulta den rebiba nos economia cu ta sumamente necesario.
