Hopi hende ta enfoca riba entrada nan di impuesto, ora cu ta pensa riba CAft. Tur cos ta draai rond di e balansa entre entrada y gasto nan di pais Aruba.
Sra. Luenne Gomez-Pieters, directora di Departamento di Impuesto, a splica cu ta raporta cada cuartal, entradanan di impuesto na Directie Financien, pa despues e informacion aki wordo manda na e oficina di minister di finansas pa por informa CAft ariba e situacion financiero di nos pais. Recientemente CAft a manda su reaccion riba e di dos rapport di ehecucion, cual ta cubri e prome seis lunanan di aña, pa asina tin un bista con ta bayendo cu e entradanan y gasto nan den su totalidad.
CAft tabata tin algun punto di atencion of recomendacion, mirando cu esaki ta cay bou di nan tarea di supervision di finansas publico pa asina sigura cu e metanan stipula pa cu e begrotingstekort ta wordo realisa. Ta importante pa remarka cu si compara entrada nan di impuesto di 2018 cu e entrada nan di e prome mita di aña 2017 a cobra 13.5 miyon florin mas compara cu aña pasa. Ta haciendo tur e esfuerso nan necesario pa por logra e meta nan stipula. Den su totalidad DIMP tin 48% di e presupuesto di 2018 realisa pero tambe tin algun puntonan di atencion ora ta trata entrada di winstbelasting, grondbelasting y tambe impuesto di vehiculo di motor.
Pa loke ta trata e entrada nan di impuesto di winstbelasting, a duna como reaccion cu tin cu tene bon na cuenta cu e sistema di winstbelasting a cambia na aña 2015. El a cambia di un “aanslagbelasting systeem”, pa un “voldoening op aangifte systeem”. Esey ta nifica cu e winstbelasting no ta manera antes cu ta entrega e aangifte winstbelasting y e Inspector tin cinco aña di tempo pa pone un definitieve aanslag. E sistema a cambia caminda cu e aangifte ta wordo entrega y na momento di entrega e aangifte, e impuesto ariba e ganashi lo mester wordo paga. Tin dos momento den aña cu esaki ta sosode: na luna di mei y na luna di november. Ta compronde e preocupacion di CAft pa cu e entrada nan di winstbelasting, pero por splica sigur pakico ainda, e entrada nan di winstbelasting ta kedando atras, mirando cu tin un di dos termino di pago na November ainda cu tin cu drenta.
Ta importante pa menciona cu ta keda papia riba e topico di compliance. Kico ta compliance? Cumplimento cu reglanan of reglamentonan cu tin den ley. No obstante e hecho cu mester a haci aangifte na mei ultimo, pa loke ta trata winstbelasting 2017, ta mira cu tin 3.421 cliente cu no a entrega niun aangifte na Departamento di Impuesto. Esey ta algo preocupante. Di un bestand di 8.218 cliente, tin 3.421 cliente cu no a entrega ni un voorlopige aangifte, ni un definitieve aangifte pa winstbelasting. Esey no ta falta di Departamento di Impuesto, no ta falta di gobierno, no ta falta di minister. Esey ta algo cu ta responsabilidad di e cliente mes. E cifranan aki di compliance, ta preocupante, pasobra esey ta nifica cu e clientenan no ta bezig ta asumi nan responsabilidad ora ta trata entregamento di formulario di winstbelasting y e pagamento di belasting concerni. Ley ta duna si e posibilidad pa pone un cobransa adicional, manera un naheffingsaanslag cu un boet pa e compania nan cu ta laat of no a entrega e formulario y no a paga. Esey ta bira e siguiente paso cu lo bay cana mirando cu esaki ta un obligacion den ley cu mester cumpli cu ne.
