Aruba tin cu trata cu un cantidad relativamente grandi di delitonan di frontera, manera contrabanda di droga, traficacion di persona, trafico di arma y labamento di placa. Banda di esaki, e conexion y relacion entre e mundo superior y baho mundo ta crea un menasa serio pa e funcionamiento di nos estado di derecho. Esaki ta trece tur su consecuencianan pa e sociedad, e situacion real pa locual ta inversion y e forma con Reino ta wordo mira den mundo.
Mirando cu den bista internacional Aruba ta na un paso di haya sancionnan riba tereno di traficacion humano, lo reenforsa e departamentonan di Cuerpo Policial y instancianan cu tin di haber cu esaki y lo reorganisa y busca ayudo tecnico di afo pa asina asisti y traspasa nan conocemento na autoridadnan local.
Relaciona cu esaki, Partido MAS tin como meta principal pa contribui na e fortificacion di husticia, por medio di: Crea un inventario concreto den cada departamento di husticia. Ehecuta un maneho cu cifranan realistico riba personal, material y e situacion cu e personal ta trahando aden; Percura, pa tanto posicionnan di e werkvloer te cu e management di cada departamento, tin oportunidad pa estudio continuo riba midden y hoger kader, pa asina lanta e nivel y brinda posibilidad pa crecemento den e aparato di Husticia; Lo percura pa tur diensthoofd tin un “ Veiligheidsonderzoek” na ordo conforme nos leynan, di tal manera cu nos por brinda departamentonan di Husticia transparente y confiabel.
Lo reenforsa y amplia e departamento di Jeugd en Zeden Politie pa no traha solamente riba mas caso di abuso di entre otro menor, sino tambe pa por traha mas riba tereno preventivo. Lo centralisa y amplia Slachtofferhulp, cu actualmente ta conta cu solamente 2 persona pa ful Aruba, pa por opera ariba henter e isla y pa ta na disposicion di diferente departamentonan di gobierno. Slachtofferhulp lo haya un rol unda cu lo mantene e informacion central pa tin mihor bista riba e problematica na Aruba.
Departamentonan manera Departamento di Asuntonan Social, Voogdijraad, Reclassering, Cuerpo Policial y otro partnernan lo mester traha hunto den esaki, pa asina tin miho bista riba problemanan social.
