“Si bo kier combati corupcion, e lo rekeri mas cu simplemente punta dede y haci investigacion. E lo rekeri tuma accion mediante introduccion di mecanismonan pa preveni esaki”, asina Daphne Lejuez, miembro independiente di parlamento, a duna di conoce awe. E ta un candidato riba lista di partido Accion 21 y ta cla pa sigui sirbi comunidad sea den parlamento of den Conseho di Minister.
Transparencia ta un di e enemigonan mas grandi di corupcion, pasobra e ta tene esunnan envolvi responsabel pa duna cuenta pa nan decisionnan y actonan. Gabinete Wever-Croes a cay pa motibo di corupcion den seno di fraccion di POR, un di e partnernan di e coalicion. Mientras cu di un banda ta papia di integridad, ta constantemente ta scucha di investigacionnan, entre otro Flamingo, cu a nace bou di e gobierno saliente, relaciona cu posibel corupcion cu otorgamento di tereno tambe.
“Pa e motibo ey, hunto cu Accion21, mi ta boga pa introduci cambionan pa garantisa mas transparencia y acceso na documentacion den e aparato publico, den gobierno y den parlamento. Integridad ta mas cu un palabra, e ta un accion cu mester ta visibel pa tur ciudadano a base di hecho y ehempel”, asina Daphne Lejuez a termina bisando.
