Bunita ceremonia di despedida pa Miro Dabian na Hulanda

599
Herdenking Miro Dabian

Den Onze Lieve Vrouw Onbevlekt Ontvangen Kerk na Den Haag a tuma luga un ceremonia special den memoria di Miro Dabian, kende a fayece 2 di juni ultimo.

E ceremonia special – den presencia di yiu muhe di Miro Dabian, Caresse Imon-Dabian y esposo– a conta tambe cu presencia di demas famia, ex mentornan di Arubahuis, personal di Arubahuis y ATA Europa y personanan cu a conoce Miro.

E ceremonia a conta cu un discurso di Minister Plenipotenciario Guillfred Besaril y Caresse Imon-Dabian. E respons tabata na encargo di pader Janssen.

Minister Besaril den su discurso a para keto na Miro Dabian como un persona hopi grandi y keri. ‘P’esey e ta na su luga pa un luna despues cu Miro a bay laga nos tanto den nomber di coleganan di Aruba y ATA Europa unda Caresse ta labora y tur otro hendenan pa a bini hunto den un momento asina pa tuma despedida di un gran persona.

Staf y personal di Arubahuis y Pais Aruba un biaha mas ta extende palabranan di condolencia na Caresse y famia. Miro tabata un homber grandi y stima,’ asina Minister Besaril a bisa.

Caresse Imon-Dabian a papia como yiu den nomber di famia di Miro Dabian. Den su discurso Caresse a elabora riba e rol importante cu Miro a hunga den guia di studiantenan Arubiano na Hulanda. ‘Miro tabata disponibel 24/7 pa cualkier studiante cu ta den problema. No ta importa color politico, famia, orientacion sexual. Si e mester atende un caso 3or di marduga of na cualkier parti di Hulanda, Miro ta haci esaki!. P’esey hopi studiante conoce Miro y e conoce mayoria studiante pa nomber. Esunnan cu Miro no conoce ta pasobra of nunca nan tabata den problema of nunca nan a bishita Arubahuis,’ asina Caresse a conta riba e trabao di Miro na Arubahuis.

Caresse a describi Miro como un persona hopi social, cu ta gusta fiesta y baila. ‘Sinembargo mas importante di Miro ta cu e tabata un Arubiano orguyoso cu alma y curpa, husto, sabi y un poco cabesura. Miro ta conoci pa tin un boca grandi, pero cu un curason chikito y semper na un bon luga.’

Finalmente Caresse den nomber di famia di Miro a gradici Arubahuis pa e ceremonia special aki y na tur cu a bin pa despedi y recorda Miro Dabian.

Musica tabata bou guia di Alwin Toppenberg cu a toca e piesa Despedida. Prome cu esey Alwin a papia riba su experencia cu Miro Dabian principalmente den guia di studiantenan. Su persona hunto cu Haime Kelly y Miro Dabian na 1983 di e siglo pasa a introduci e sistema di mentor na momento cu Aruba tabata na caminda pa haya su Status Aparte y mester a cuminsa na duna guia na e studiantenan Arubiano.

Den esaki segun sr. Toppenberg Miro a haci un tremendo trabao. ‘Nos no mester lubida cu pa hopi hoben Arubiano e ta un paso grandi pa bin studia na Hulanda: un pais straño, otro cultura y idioma. Pesey Miro a mira e necesidad pa bin cu bon guia. Tambe a bisa na un principio cu e mentor mester ta bin for di e mundo di enseñansa pa asina tin comprension di e obstaculonan cu e studiante Arubiano por haya su mes cu ne,’ asina Alwin Toppenberg a bisa.

Tur presente tabata tin palabra di aprecio y gratitud pa a organisa e ceremonia aki na honor di Miro Dabian y pa kico el a nifica pa Aruba.

Fotografo: Nico van der Ven.