Aruba Airport Authority N.V. (AAA) orguyosamente ta anuncia y anciosamente ta spera e yegada di 2 buelo semanal pa Aruba desde Diasabra 23 di December, 2017 pa e temporada di winter.
E hecho interesante ta cu tur 2 buelo lo ta yegando for di Minneapolis pa Aruba rond di e mesun orario: “Esakinan ta 2 opcion hopi interesante pa e biaheronan cu interes pa biaha pa Aruba for di Minneapolis,” asina CEO di AAA Sr. James Fazio a bisa. Sun Country su prome buelo pa Aruba lo ta pa e temporada di winter y lo sigui for di December 2017 te cu April 2018 via Minneapolis/St. Paul International Airport, Terminal 2. E servicio lo inclui un buelo pa siman, saliendo riba Diasabra. E avion tipo B737-800 lo yega 4:55 pm y tin e capacidad pa acomoda 168 pasahero. Delta Airlines tambe lo brinda servicio semanal MSP – AUA (Minneapolis – Aruba) desde 23 di December, 2017 y lo sigui ofreciendo e servicio aki te cu 31 di Maart, 2018. E buelo aki lo ta e di 3 buelo non-stop pa Aruba door di Delta Airlines, mirando cu Atlanta y New York tambe ta wordo ofreci non-stop door di e aerolinea.
E buelo nobo semanal pa e temporada di winter MSP – AUA lo wordo opera cu un avion tipo B737-800 lo yega 4:40 pm y tin e capacidad pa acomoda 199 pasahero. AAA ta ansioso pa yama bonbini na e 2 buelonan inaugural aki Diasabra awo y lo bai yama e pasaheronan for di Minneapolis bonbini cu un toke di aprecio. Lo por sigui e evento inaugural via e facebook page di airport “Queen Beatrix International Airport – Aruba” Daisabra awo. Mas detayes di e opcionnan di biahe nobo lo wordo duna den future.
