Metabolic Foundation ta contento di anuncia cu a ricibi fondo di UNESCO pa hunto cu Brenchie’s Lab, eherce algun experimento pa colecciona data den lama entre e periodo di October 2021 te Maart 2022.
Na 2019 Metabolic Foundation bou di e proyecto Brenchie’s Lab a cuminsa traha riba un programa di actividad pa colecciona data riba nos calidad di aire y vegetacion (NDVI). Tambe a organisa varios tayer riba visualisacion di data uzando e programa ‘Processing’. A analisisa imagennan uzando inteligencia artificial, cu e programa ‘Tensorflow’. Por admira mas detaye di e actividadnan aki riba e pagina science.brenchies.com.
Cu e proyecto aki lo sigui desaroya sistema pa colecciona data riba nos medio ambiente pero cu un enfoke riba lama. Lo analisa micro-plastico den santo blanco, lo analisa e hanchura di nos playanan uzando imagennan di satellite, lo midi acidificacion di algun lama, como tambe e cambio den e nivel di lama na diferente playa.
E meta ta pa e trabou aki por ta di balor pa Aruba monitorea e cambionan cu ta pasando den nos medio ambiente den un forma cu ta accesibel pa publico y lo por yuda Aruba raporta mas data pa e Sustainable Development Goals.
E programa aki ta habri pa participacion. Si bo ta interesa den e coleccion di data y kier participa den e proceso aki, por tuma contacto cu Brenchie’s Lab na [email protected] of sigui Brenchie’s riba Instagram pa keda informa riba actividadnan cu lo tuma luga te cu Maart 2022.
