Politico Booshi Wever no ta compronde cu un gran parti di pueblo ta pasando den e crisis y Prome Minister Evelyn Wever Croes prome cu e subi avion pa bay vakantie, ta bisa cu Aruba ainda ta den negociacion cu Hulanda. Mientrastanto Corsou si a yega na un acuerdo.
Loke e mandatario a haci ey y e hecho cu el a tira un discurso nacional net prome cu el a biaha, mas bien ta cosnan cu ta pasa den un regimen dictatorial. Putin tin su hendenan ta sufri y despues ta mir’e na su cas vacacional, mientras su hende ta den friu. “Cosnan asina e ta lagami corda.”
Tin indicacionnan dictatorial den Prome Minister manera ora e ta tuma un actitud cu “sibo no ta cu mi, keda leu”. UPP y Booshi Wever sigur lo keda leu di tur loke ta un traicion contra e comunidad. Hasta Secretario di Estado Raymond Knops a bisa den Tweede Kamer cu e confiansa no t’ey e ultimo dies añanan. Cosnan a bay robes pasobra Mike Eman ta crea den “sprookjes” y otronan a haci pio despues.
Wever no tabatin ningun palabra bon pa e discurso nacional, for di su sitio di resort na Florida “dood leuk ta bisa cu el a yega na un acuerdo caba”. A tuma hende haci, pueblo ta sufri, haci prestamo cu ta trece mas debe, etc. E mester ta mas transparente y sincero cu e pais. Pueblo di Aruba mester ta alerto pasobra Parlamento ta laga tur cos pasa. A bin cu CAft pero tur hende a bay di acuerdo; despues Tjon y Thijsen a bay torno na CAft, cu cambionan cu ta bay linea recta loke tabata palabra door di Gobierno di POR-RED-MEP. Esaki a causa cu awendia tin un CHE RAFT. Pero tambe tin un Gobierno, cu tin un mocion di desconfiansa, ta sigui negocia loke no por wordo negocia. Nan mester bay, pero e stul ta masha dushi.
Den henter e situacion aki Gobierno a bay di acuerdo caba y unico cos cu Parlamento por haci of bisa ta “voor” ora trata e ley, ya cu si bisa “tegen” ta perde e resto di financiamento. Tur esaki ta debi cu tin un Gobierno swak na Aruba.
