Riba 17 di juli 2009, esta 9 aña pasa, e facilidadnan na Parkietenbos a wordo poni den funccion pa asina por procesa sushi y na mes momento cuminsa cu e ultimo fase pa caba di alivia e situacion pa e habitantenan di Parkietenbos y Simon Antonio.
Tabata trata aki di un proyecto di “WasteAway- facility” cu Bouldin & Lawson a realisa na Aruba. E intencion tabata ta pa logra un solucion permanente y sostenibel pa loke ta trata procesamento di desperdicio. Sostenibel den e caso aki nos ta referi no solamente na tecnologia, pero tambe financieramente. Pues un solucion cu nos como Aruba lo por a carga.
Awor nos ta scucha cu kier bin cu un solucion, esta un incinirator pa WTE, pero cu tin hopi pregunta riba e costo y durabilidad di esaki y tambe pa e medio ambiente. Pues con sostenibel e ta y con nos por carga esaki, mirando cu minister Otmar Oduber kier bin cu un proyecto cu ta costa rond di 320 miyon florin y cu su operacion lo ta rond 18 miyon florin pa aña.
E maneho di desperdicio e tempo ey tabata dirigi riba stop e kimamento riba dump, loke a sosode entrante 1 di mei 2002, pa alivia e habitantenan. A sera e dumpnan na Vader Piet y Jaburibari, cu despues a bira un parke di recreo. A bini cu e planta di Bouldin & Lawson pa procesa e sushi y baha e sero di sushi na Parkietenbos. E planta aki a wordo inaugura riba 17 di juli 2009 y a funciona te na final di november 2009, na momento cu e boycot a cuminsa dor di Mike Eman, Mike de Meza, Benney Sevinger y no lubida Otmar Oduber y otronan, haciendo cu e pueblo di Parkietenbos y vecinderio a bira victima.
Tristo cu awe nos por mira cu Otmar, cu tambe a percura pa e boycot pa mas cu 7 aña, ta pretende awor di ta e angel wardador di e bario. Pero tur loke ta bay sosode ta cu na augustus aki lo bay tin un show completo y na final ta pueblo ta bay paga p’e. Lo bay pasa un kartelheffing pa asina acomoda tur su amigonan y financistanan. Y parce cu no tin orea pa scucha kico ta biba den comunidad. No tin oido pa realmente discuti tur posibel solucionnan, corda pa yega na stipula un maneho duradero y sostenibel financieramente pa nos pais.
Mas tristo ta pa mira kico e boycot contra e planta tabata ta. Den e Evaluation Report, cu Bouldin & Lawson a traha, despues cu minister mes a paganan pa bin haci un investigacion, ta resulta cu e boycot no ta solamente tira piesanan den e crusher, pero tambe destruccion di instalacion dor di corta kabelnan, horta koper, mescos cu partinan di hero. Tambe e rapport aki ta bisa cu asina mes e planta por wordo poni den operacion, pa un suma di 1,7 miyon dollar. Compara cu e 200 miyon dollar cu Otmar Oduber kier bay gasta, esaki ta e solucion riba corto plazo cu por haci, esta di hinca 1.7 miyon dollar y pone e planta cu t’ey caba den funccion bek. Pero naturalmente cu esaki no ta lucrativo pa e minister, ya cu no tin probecho financiero pa saca aki. Ta lastima pa mira loke e rapport aki ta papia di dje, cu ta mustra con leu un gobierno di AVPOR por a bay, esta di boycotea e planta aki, djis pasobra e ta di un otro signatura politico. Esaki ta e tristo di Aruba cu nos ta biba aden.
UPP ta kere cu ta bira tempo pa e partido mas grandi den e coalicion y di oposicion lanta foi soño y realisa loke e minister aki ta bin ta haciendo. Ta bon pa nan por pasa den e rapport aki cu Bouldin & Lawson a traha, pero tambe realisa cu e rumbo cu e minister aki ta aden ta liña recta contra e pensamento di e fraccion. Pasobra contrario na loke e.o. presidente di Parlamento sr. Thijsen ta bisa, cu ainda tur cos ta habri y por bay tur caminda, e minister y e directornan y hunta di supervision di Serlimar ta sigui compromete Serlimar y nos pais, ya cu ta bay contra nos codigo penal. Pasobra e ta comprometiendo nos pais, sin cu e tin presupuesto p’e. E directornan hunto cu e hunta di supervision tambe ta responsabel p’esaki. Nan no por bay sconde tras cu ta minister a duna opdracht, pasobra nan ta para responsabel pa nan actonan. Minister por duna “algemene aanwijzingen”, pero no por duna instruccionnan directo, manera e.o. e fixed bidding pa e trucknan, huurmento di facilidadnan na Pos Chikito, dunamento di contractnan di e loading na Sero Teishi sin ningun clase di destaho publico, etc etc.
Tur esakinan a sosode, pero parce cu Parlamento no tin interes pa atende y unico caminda cu ta resta ta Ministerio Publico.
