E desaroyo di e situacion entre e taxistanan y minister Chris Romero a continua. Diamars tabata tin un conferencia unda cu e taxistanan a trece nan preocupacion riba un cantidad di cos cu no ta corecto den nan bista, di cual motibo den oranan di atardi, mesora a haya atencion di gobierno pa aclarea e diferencianan cu ta existi.
Linda Orman, vocero di e bondnan di taxi, a splica cu nan a yama nan pa presenta 3’or di atardi diamars, na Bestuurskantoor. Mirando cu e tempo tabata riba man, algun di e taxistanan no por a presenta, pero mayoria di central tabata tey si. A bay door di e regulacionnan. E tarifa tabata cla, ta e regulacion tabata tin discrepancia den dje, esta cu e taxistanan no tabata di acuerdo. A sinta bek cu e minister na mesa y a bay riba e puntonan bek. E minister a expresa cu berdad a bay door di dje, debi na nan drukte, el a bay riba e ultimo reunion so. Tabata tin dos reunion anterior, cu a handle e asuntonan.
Tur punto cu tin a keda respalda pa articulonan den ley, aunke e minister a expresa di no bay fuera di ley. Tur e articulonan cu tin pa cobra pa maleta, tur eseynan ta respalda den e ley.
A trata hasta e signery di Taxi riba dak, splik’e e motibo pakico tras di esaki. E minister a bay di acuerdo y a marca riba e puntonan cu a bay di acuerdo cun’e. E ahustenan chikito cu tabata tin riba dje, cierto palabracionnan chikito cu no tabata tey a cambianan. E ora a pasa esaki pa sr. Thiel, kende a bisa cu e lo ta druk y pa mas tardar diahuebs e lo ta full afgerond.
Cambionan
Segun Orman, nan no a puntra ken of ken no a cambi’e. Pero cu awo e ta poni manera mester ta. Tur dos banda di mesa ta di acuerdo cun’e y esey pa e bond, ta suficiente. Si e minister ta worry pa bis’e, esey ta keda na minister cu tin cu haci’e. E bond ta worry cu el a wordo ahusta manera mester ta. Tur dos banda, di taxista y di parti di minister a bay di acuerdo cu e puntonan y pa e taxistanan ta suficiente.
Garantia
Por mira cu tur esaki por bin consecuencia pa nan departamento y tambe pa e ministerio. Nan lo ta mas cauteloso for di awo padilanti cu cierto decisionnan cu nan ta tuma. Di parti di e bond di taxistanan, lo percura pa notuleer e reunionnan tambe, pa evita mal comprondemento, of pa evita cu tin cu bolbe renegosha bek riba algo cu ya a wordo acorda caba.
Trankilidad
Pa loke ta e acuerdo, por bisa cu tin un trankilidad. Orman a splica cu tin e stress pa haci e lista di prijs, wak pa e ta bon, etc. Apesar cu nunca e lo ta 100% perfecto. Tin e stress tambe di e achterbaan, cu kier pa tur hende nan opinion , cu pa nan ta e opinion importante. Tin cu trata tur hende cu e respet, scucha nan, aunke bo ta perde bo tempo di trabao, pero tin cu duna cada persona cu tin un problema of tin cualkier remarca, tin cu dun’e su atencion 100%. Cada hende ta sinti cu nan ta importante y bo tin cu mustra nan cu nan ta importante p’abo. Nan kier laga e lista di prijs cuminsa lora y despues di paar di tempo ta bay pa e siguiente punto.
E taxistanan a cuminsa cu esaki caba, Orman ta enfatisa.
Prioridad
E lista di prijs tabatin 9 aña sin a wordo aumenta. Tabata un di e prioridadnan cu nan kier a cuminsa y keda cla cun’e. Awo e minister por ta mas trankil cu un punto ta cla.
Minister Chris Romero tabata hopi dispuesto, hopi receptivo y cu hopi gana pa soluciona e problema aki. A sinta na mesa y awo por bisa tur cos a bay trankilo. Minister tabata hopi amabel. Na prome instante, ora cu el a scucha di e conferencia di prensa cu a tuma luga diamars, el a reacciona, pero a sinta na mesa y ta aki caminda ta reflexiona y tur cos a bay bon.
Lista di punto
Orman tin firma pa e pensioen di e taxistanan di edad. Awo tin cu sinta prepar’e bon y presente na minister. Esaki ta bay ta un cambio den ley. Kier bay cu esaki via parlamento. Mester percura pa tin tur cos cubri pa ley y tur cos huridicamente bon hinca den otro. Esey tin cu bay schakel in un persona cu ta traha den e seccion huridico pa percura pa tur cos cana netjes.
E prome punto tabata e MB cu a wordo anula, di dos punto ta e lista di prijs y awo e di tres punto ta bay ta e asunto di pensioen. Pa loke ta e asunto di pensioen, ta spera cu ainda por trata esaki pa fin di aña. E bond ta prepara p’e pa bay mesa cun’e, segun Linda Orman.
