RCA ta un di e 167 luganan cu ta participando den Aruba Doet y e boluntarionan tabat’ey presente pa asina nan yuda duna e compleho un facelift.
Segun miembro di directiva di RCA, Yazmira Tromp, fuera di e proyecto di Aruba Doet, di verf e murayanan, a haci e luga limpi, chapi y tambe duna e entrada di e club un bista mas bunita, planta algun mata. Probechando e proyecto pa atrae mas boluntario y tambe pa duna un limpiesa na e club.
Aruba Doet ta bezig rond di Aruba for di ayera. Tromp a menciona cu e ta contento cu Aruba por haya un aporte, vooral den e crisis aki cu por yuda, den e caso aki RCA, pa duna e club un bida.
Yazmira Tromp ta manda un mensahe: “Contribui. E trabao di boluntario ta hopi bunita, ta un trabao di curason. Mas nos contribui, mas cos bunita ta sali fo’i dje.” Na RCA tabatin un grupo grandi cuminsando fo’i 7’or di mainta y parti den dos ploeg. E idea ta pa caba cu e murayanan, haci limpi y duna e club un bista bunita.
Den e proyecto di Aruba Doet esun cu kier a participa como boluntario via nan website. Pero si kier yuda RCA, por yega e club na cualkier momento di dialuna pa diabierna, fo’i 4’or bay ariba te laat.
Tin varios grupo ta train. Tin un famia grandi y si kier ta parti di RCA, por haci esaki.
Tromp a gradici Aruba Doet pa duna RCA e oportunidad pa sigui cu e proyecto di muraya cu ta bezig fo’i comienso di aña. Tambe ta gradici tur esunnan cu a yuda di un of otro forma, manera donacion di cuminda cu por a duna e boluntarionan y esunnan cu a haci donacion di mata pa haci e entrada di RCA mas bunita.
