Bisiñanan mes a gara ladron den Morgenster

4573

Diaranson anochi grito y coremento den Morgenster a pone mas habitante sali for di nan cas. Un conoci di Polis, Elton Kock, atrobe a drenta propiedad di otro hende. Ora a descubri’e, el a bula cura y sali na careda, pero e doño di cas a sigui’e. Mientrastanto e gritonan a pone cu a bati alarma mesora na Polis.

Tabatin un unidad di Polis cerca y den menos di un minuut a yega na e sitio. Ey e defensornan di ley a actua mesora contra e practicante di economia facil, esta ladronicia. E sospechoso, conoci di Polis, tabata arma cu un baranca den man. El a bisa Polis cu tabata pa defende su mes contra bisiñanan decidido cu a sali na careda su tras.

Polis a busca mas informacion n’e sitio y finalmente a detene e sospechoso. A pidi transporte special pa por a hib’e Warda di Polis pa mas investigacion y interogacion. Bisiñanan a expresa na e sitio di ta fada y cansa cu constantemente e ta horta den nan casnan. Ta parce cu husticia cada bez atrobe ta dun’e un chens pero toch e ta cay bek den su mal maña.