Iron Order Motorcycle Club Aruba un biaha mas lo bay tin un evento pa yuda den e caso aki, nos muchanan. Aña pasa nan a organisa un evento cu tabata un ride y tabata un exito rotundo. Tabata tin den plan pa recauda fondo pa regala 25 mucha cu tas y material di scol. A yega un total di 60 tas aña pasa.
E aña aki a hisa nan meta. A pone pa yega na 100 tas y ya caba nan ta yegando nan meta. Iron Order Aruba ta pertenece na un club internacional y ta rekeri di nan pa haci un charity event anual. Den esey nan ta actualmente.
Vladimir de Cuba, vide presidente di e club, durante un conferencia di prensa na Hooiberg Sotre & Biker’s Lounge, a splica cu ya pa algun aña caba nan a bin ta yuda Wilhelmina Kankerfonds yuda colecta banda di caminda.
Tambe nan a bin ta yuda otro bikers pa yuda renomba cas, etc. Desde aña pasa nan a bin cu e idea pa haci un Ban Bek Scol Ride. Eynan nan a recauda fondo pa regala 60 mucha di diferente scol tas.
E aña aki, manera tur hende sa, Covid a brake Aruba y mundo henter. Esey a trece cun’e cu lastimamente no por a organisa un ride debidamente, mirando cu no ta duna permiso pa esaki via e medionan concerni.
E ora a bisa cu no kier laga e muchanan na caya. Kier toch, y vooral e aña aki, nos muchanan tin mester di esaki. E ora bin cu e idea pa haci un School Pack drive.
Kico e ta encera
Diadomingo awo, dia 2 di augustus, for di 11’or di mainta pa 5’or di atardi, tur biker y pueblo di Aruba en general, ta mas cu bon bini na Aruba Driving School na Cumana, ex CD’s and More, unda cu por haci donacion pa asina yega na e meta di 20 mucha di cada un di e 6 scolnan, lo haya tas, cu etui, schrift, potlood, etc y tin chens cu lo por bin un agenda acerca.
E Club di motociclista ta contento cu e reaccion di pueblo di Aruba, pero tambe di clubnan for di exterior, cu ya caba a cuminsa haci donacion.
Esey ta pone cu e chens ta hopi grandi cu e aña aki atrobe lo surpasa e cantidad premira. Ta mik pa 100. Pero si tur cos bay bon, lo yega rond di 120 pa 125 tas. Esey ta nifica cu lo yuda mas scol y mas mucha lo por haya un tas cu tur e rekisitonan.
Di parti di Iron Order, ta haci un apelacion na tur biker di Aruba, tur club cu tin of bo ta core independiente, ta gradici for di awor caba, pa por pasa diadomingo awo, dia 2 di augustus, entre 11’or di mainta y 5’or di atardi na Aruba Driving School na Cumana, pa haci bo donacion. Despues di esey tur biker, tur hende ta mas cu bon bini na Hooiberg Store. Lo bay tin un forma di gratitud di parti di e club, ya cu no lo por tabata tin un ride.
