Cooperacion ta keda esencial pa hisa calidad di cuido. Durante su bishita diahuebs dia 23 di juni na Horacio Oduber Hospital, Secretario di Estado di di Salud, Bienestar y Deporte (VWS) sr. Maarten van Ooijen a demostra un empatia enorme pa cu e empleadonan pa nan amor y cuido pe pashentnan den Hospital.
Nos Hospital no solamente ta trata pashentnan local pero tambe hopi turista cu ta bin vakantie Aruba. Aruba su pilar economico mas grandi ta turismo y Hospital ta un parti esencial den esaki. Aruba tin un populacion di 112.000 habitante y riba dje ta conoce un 15.000 persona indocumenta cu tambe ta haci uzo di nos Hospital, hopi biaha sin por paga pe.
E poblacion di Aruba ta paga pa esaki indirectamente y tin un suma di casi 20 miyon florin na factura habri. Pa Hospital esaki ta keda un punto di atencion den su combersacionnan cu gobierno.
Durante e recorido den Hospital a pasa entre otro na departamento di Cuido Intensivo y departamento di Covid. Solamente cu e sosten di VWS pa loke ta personal y material e departamentonan aki por a logra trata hopi pashent. Hunto cu personal di nos Hospital mas di 150 enfermera y dokternan via VWS a logra duna cuido di Covid na comunidad di Aruba. Un gradicimento enorme a wordo duna door di personal di Hospital na e Secretario di Estado.
Durante e combersacionnan a trece dilanti e retonan di cuido na Aruba. Embehecemento, aumento di malesanan cronico y un cantidad grandi di persona cu obesidad. Di 5 persona, 4 di nan tin sobrepeso y un 18% di nos poblacion tin diabetes cu tur consecuencia esaki ta trece cune. Duna cuido na e luga corecto y prevencion ta sumamente importante pa trece mehoracion den cuido di salud y tambe pa mantene e gastonan di cuido. Ademas tin e retonan mundial pa loke ta prijs, scarsedad di personal, inflacion y e consecuencianan di Covid cu tin influencia grandi riba nos Hospital.
Director di Hospital drs. Jacco Vroegop: “e balans entre finansa y salvaguardia e calidad di cuido ta bira mas dificil pa sostene. Un cooperacion di compra y capacidad entre e islanan, e formacion di Rubiano cu kier traha den cuido pa asina evita pa trece labor externo mas caro y un financiamento corecto di cuido ta esencial. Ademas, discontinua e recorte den cuido ta importante pa preveni un lista di espera largo cu ta trece consecuencianan dañino den salud. Tambe pa sigui inova y haci e inversionnan di sostenibilidad mas necesario cu lo por yuda spaar.”
Finalmente, e Secretario di Estado a demostra su entusiasmo pa e transicion positivo cu Hospital ta pasando aden y aunke tur reto no a lubida riba e ser humano.
