Tin varios tema di importancia cu mester wordo aclaria, desmenti y desenmascara loke Minister Otmar Oduber a trece ultimamente den publicidad, particularmente riba Parlamentario Bemmy Sevinger, e miembro di fraccion di AVP a mustra den conferncia di prensa.
E ex Minister di Infrastructura a mustra cu entre otro un di e temanan tabata e huurmento di edificio di DTI na Pos Chikito cual segun sr Sevinger, ya caba e puntonan aki a wordo presenta na su persona durante reunion publico den Parlamento.
Gobierno tabata huur edficio di DTI pa hopi aña, esta 14 aña y si conta esaki na e prijs di 60 pa 70 mil florin pa luna tur hende por imagina cuanto miyon gobierno a paga na huur pa e edificio aki cual placa por a yega na cumpra e edificio nobo.
Parlamentario Sevinger a sigui mustra cu gobierno durante esfuerso pa bahamento di gastonan di gobierno, a wordo confronta cu mester baha gastonan di huur cu 10% y e tempo ey mas cu 15 miyon tabata wordo gehuur pa famia Croes so for di cual gobierno mester a sali for di nan.
E edificio di DTI na Pos Chikito gobierno a haci un apelacion pa doñonan baha e huur pero categoricamente a nenga esaki y den e proceso pa yega na prolongacion di e contract, e comision negociado a logra di haya reduccion di e prijs.
Sinembargo na momento cu a construi e Green Corridor a bin ripara cu no por mantene e servicio di keur auto na e localidad aki pa diferente motibo y aki Parlamentario Sevinger a mustra cu tabatin hopi keho di entre otro sindicato cu tabata informa gobierno cu trahadonan ta bira malo den e luga, e luga no ta apto mas pa keur auto, no tabatin circulacion di biento adecuado y esaki a conduci cu e departamento aki tabatin un di e porcentahe mas halto di hendenan cu ta bira malo constantemente.
Durante difernte reunion cu sindicato e puntonan aki a wordo atendi cu gobierno y consecuentemten esaki a pone cu Infra Team a bay en busca di un otro edificio pa huur y a hay a diferente luga pa por a muda pero na momento cu a bay over pa huur esakinan, doñonan a informa cu ya nan a haya otro huurdonan pa e edificionan.
Benny Sevinger a sigui mustra c’un inversionista cu tabata ehecutando un proyecto pa su negoshi priva y a dicidi di drecha esaki pa asina DTI tin e opcion pa huur e edificio pero sin cu yega na un acuerdo inicial.
Diferente aspecto cu tabata necesario e inversionista aki a hinca den e proyecto y na luna di december a cuminsa cu mudamento y gobierno a informa doño di e edificio na Pos Chikito cu lo termina e contract di huur y cu DTI lo muda.
“Na momento cu gobierno a cambia, minister Oduber, minister integro, a dicidi di bay persigui tur hende, tur hende cu minister por a firma den ultimo dianan, e lo bay kibra nan contract, sigur esun di e edificio di DTI pa motibo cu gobierno bandona un edificio cu ta su sponsor di campaña.
Minister Oduber sin puntra advies, a dirigi un carta pa DIP caminda e ta ordena pa prolonga huur di e edificio di Pos Chikito, pues a muda DTI pa Barcadera caba pero minister Oduber a dicidi cu ta prolonga huur di e edificio bieu cual edificio a wordo afgekeurd, caminda trahadonan ta bira malo y minister integridad a dicidi di cuminsa un caso contra e decision di gobierno pa huur e edificio di Barcadera y hues a mustra e minister cu esaki no ta corecto.
Durante di reunion publico a haci varios pregunta na minister Oduber caminda e contestanan tabata mal bruha ya cu entre otro su gobiero a pone 300 mil pa cubri e gastonan di huur cu a aumenta pero ta informa parlamento cu e gastonan di huur lo ta 200 mil florin, caminda 100 mil ta keda colga y minister no por a splica kico ta bay pasa cu s suma aki.
Minister Oduber mes den su contesta riba preguntann haci na su persona durante di reunion riba diferencia cu tin entre e edificio nobo na Barcadera y esun bieu, ta confirma den forma contundente cu e diferencia ta grandi, caminda e facilidad nobo di DTI no solamente ta miho ekipa, pero tin ventilacion cu no ta crea un situacion peligroso pa trahadonan y tin mas espacio pa mas auto pa dia compara cu e edificio na Pos Chikito.
Ora cu e minister integro a ripara cu e mes a aclaria y aproba e mudamento necesario aki, el a bay na busca un solucion pa salba e contract di huur di e edificio na Pos Chikito pa su sponsor y ta eynan a bin cu e decision di muda Serlimar pa e edificio aki cu tur consencuencia cu esaki lo bay tin.
Aki lo bay tin un proceso di separacion di sushi cu ta apto pa reciclahe pero aki nos tin cu mustra cu mientras cu elimina dump na Parkietenbos pa motibo cu e no ta bon pa salud di habitantenan, awor ta bira pone esaki mey mey di Pos Chikito cu tur consecuencianan cu esaki lo bay tin pa habitantenan den e bario aki,” Parlamentario Benny Sevinger a mustra.
