Fiscal Wouter Gerretschen tabata encarga cu e caso di Avestruz, pero el a bay. Benny Sevinger, kende ta un sospechoso den e caso di Avestruz, a yega di bisa e recherchenan cu e fiscal ta un racista y narcista. Incluso el a bisa e fiscal esey.
E ta corda con hopi biaha e fiscal a referi na “ikke” so. Incluso hopi bes tabata zundra Sevinger door di Nelson Speed Andrade. Fiscal Gerretschen a sinti su mes cu el a haci gran cos den e caso di Avestruz.
A cera shete dia Jeff Franken pa motibo di shisheria, kende prome tabata sospechoso y despues a bira testigo. Tur esaki ta bin pasobra Ophelia Bijden a hiba shisheria y landsrecherche a detene Franken. Sevinger a indica cu el a topa un persona cu a cuminda, pero e no sa ken e ta. E persona a puntr’e riba e caso y cu Sevinger a indica di no ta mira unda ta papia di corupcion. Aki el a bin haya sa ken ta Jeff Franken, despues cu el a introduci su mes.
Segun Sevinger, su abogadonan a pidi pa lag’e bay huramenta como parlamentario, ya caba el a haci diesdos verhoor, nan a bay corte. Aki tabata unda cu e fiscal Gerretschen a bisa di no ta laga Sevinger sali. E fiscal a indica cu “Sevinger ta hefe di un criminele organisatie”, y cu e mester keda cera te ora su caso bin dilanti. E fiscal a bisa di ta dispuesto pa coopera pa laga Sevinger bay huramenta y despues regresa su cel. E huesnan a tuma decision pa lag’e bay huramenta a base di loke e fiscal mes a bisa, pero esey no a pasa. Un carta tabata manda pa su persona fo’i Oficina di Gobernador, bisando cu e no por a huramenta door di ta deteni.
Sevinger ta kere cu Oficina di Gobernador a yama e fiscal, y na luga di bisa cu el a bisa corte di ta lag’e bay huramenta y despues e ta regresa, pero a bisa cu ainda ta den investigacion. Esey a pone cu gobernador no a hurament’e. Esey ta un wega, pasobra e fiscal a bisa corte un cos y a bisa Oficina di Gobernador algo otro.
Despues di tabata cera pa mas di 70 dia, e fiscal mes a bisa e huesnan di no por haya e placa, e miyones cu Sevinger a haya. Tambe e fiscal a bay riba e echo cu ta bay pidi ayudo internacional. Sevinger ta cuestiona e echo cu a cer’e pa 73 dia, cuater aña di investigacion, a bay rond mundo y ainda kier bay pidi ayudo internacional.
E fiscal a laga sa cu asina mes e lo acusa Sevinger, uzando e palabranan “omdat hij zijn vrienden en vriendinnetjes van AVP heeft geholpen om millionaire worden.” Sevinger ta cuestiona e fiscal aki, kende supuestamente mester ta obhetivo, pero pa su forma a uza un lenguahe asina. E ora ey e ta bezig politicamente.
Pa mas lesa TREMPAN.COM.
