Recientemente Parlamentario Benny Sevinger di AVP tabata den e noticiero Enfoke pa trece diferente punto di preocupacion na conocemento di pueblo. Entre nan, a papia riba Ministerio Publico y ex-minister Guilfred Besaril di MEP.
E parlamentario di fraccion berde a vocifera e inhusticia cu ta tumando luga, en todo caso, den su bista. Sevinger ta vocifera cu den su caso, a trat’e estilo un criminal. A drenta su cas na varios ocasion, cu cacho, henter un ekipo di investigacion, bolter henter su cas y no a haya nada pa mustra cu el a horta. No tin ningun e-mail, WhatsApp, yamada di telefon caminda ta indica cu un hende a paga Sevinger pa haya algo acambio. Pues, no tin prueba.
Di otro banda, den caso di Besaril por a comproba cu el a haci y deshaci cu placa di pueblo. A cumpra material pa baby, come na grandi cu famia, biaha, haci uzo di VIP lounge manera nada, uzo di WIFI na cas, compras na supermercado y mucho mas.
Esey ta simplemente un ladronicia total. Awendia tin un sentencia y Ministerio Publico ta morto na soño. Sevinger ta sinti cu nan ta haciendo nan maximo esfuerso pa purba tapa e fechoria di Besaril mientras cu Benny Sevinger si ta persiguie mirando cu el a paga un pasashi pa su casa cu fondo di su stichting di campaña. A cer’e inhustamente e parlamentario ta sinti.
Awo cu Besaril a horta placa di pueblo por medio di un credit card, ta mira cu Ministerio Publico ta man crusa. Ora cu e investigacion a cuminsa pa cu Besaril, ora cu un e-mail a sali cu e tempo ey prome minister a indica cu ta e mes a start e investigacion. Durante tempo el a declara cu e ta ricibiendo informacion di e investigacion y cu e ta solucionando e problema. Dicon no ta mira un ‘verhoolplan’ pa prome minister y mientras den su caso si. Dicon no ta cuestiona prome minister riba fondo cu na final e ta responsabel p’e.
