Parlamentario Benny Sevinger ta kere cu Otmar Oduber ya no sa mas kico pa inventa pa trasta di kita atencion for di su persona, despues cu Minister Marisol Lopez Tromp a expone su actonan coruptivo como Minister.
“Por a scucha Otmar Oduber trata di hinca gobierno anterior den su fechorianan, purbando di acusa gobierno di AVP como esun cu a comete fechorianan y cu su persona a bin haya como Minister.Ora cu mi a scucha Otmar bin dilanti y bisa cu Benny Sevinger y partido AVP a roba su persona formalmente pa e keda den partido AVP, mi mester conclui cu realmente Marisol a suta Otmar di tal forma diabierna ultimo, cu el a cuminsa perde nocion di realidad.
En berdad Benny ta esun cu mas a hiba dialogo cu su persona, a trata di papia cune pa cosnan cu e tabata haci. a purba di pone funciona como miembro di un gobierno y no como un individuo den un gobierno.Nunca ningun hende a roga Otmar Oduber pa keda den AVP, al contrario tabatin coleganan Minister di e tempo ey cu tabata pura pa e bay, pa e wordo expulsa pa e forma di procede cu e tabata hibando.
Den varios proyecto cu mi ministerio tabata ehecutando manera entre otro Plaza Betico Croes, Plaza Padu Lampe y otronan, tabata proyectonan di cual mi persona tabata responsabel pero ta Otmar a bay pronkia y haci propaganda cu esakinan.Pa Benny esaki no tabata problema ya cu semper mi a mira nos gobierno como un gobierno caminda tur hende ta traha hunto y tur hende ta mesun responsabel pa e maneho cu mester a wordo hiba.
Pero ora cu Otmar Oduber kier papia cu a roga su persona pa e keda den AVP y cu e no kier a haci esaki ya cu e no tabata kier ta parti di corupcion, wak awe na unda e ta para y e ponencia aki tabata un mentira flagrante.E tempo ey Minister Dowers a dicidi e tempo ey cu e no ta dirigi palabra mas na Otmar pa su falta di respet pa cu su coleganan e tempo ey, kende durante di reunion di Conseho di Minister, ta lanta bay dal porta duro pa despues bin sinta bek manso manso.
Si Otmar ta sincero y por a conta pueblo cu AVP a tene un retreat na Cas di Partido pa atende diferente situacion di nos gobierno y un di e puntonan aki tabata su forma di procede como miembro di gabinete Mike Eman II. Durante di e retreat aki shete colega di Otmar Oduber, esta e shete otro Ministernan, a bisa Otmar den su cara cu nan no kier traha cu su persona mas, cu ya no ta tolera su forma di actua, pues contrario na loke awor e ta pretende di bisa durante su conferencia di prensa, ningun momento por a roga Otmar pa keda, al contrario e deseo tabata pa e bay pa caba,” Parlamentario Benny Sevinger a declara.
