Mientras cu practicamente tur luz di caya di Santa Cruz a wordo cambia pa luznan LED den e ultimo lunanan, gobierno ta concentrando pa hiba luz di caya den areanan unda cu esaki no a yega ainda. Esey tabata e caso den un parti di Papilon, unda cu Prome Minister Mike Eman a cende iluminacion nobo pa caya den presencia di bisiñanan.
Habitantenan di e barionan di Santa Cruz ta bisa cu pa hopi tempo e barionan di e districto di Santa Cruz a wordo lubida, pero awor poco-poco nan ta mirando cambio. E por ta parce cosnan chikito, pero poniendo tur hunto e ta bira hopi. Diabierna anochi den Papilon, un bario basta grandi, tabatin un area cu tabata biba den scuridad y awor e luz a cende pa nan y door di Prome Minister Mike Eman. E mandatario na e sitio a expresa “Mi ta hopi contento pasobra diferente famia, e.o. Croeze y Winterdal, a haci peticion pa den e area aki pone luz ya cu nunca tabatin iluminacion y haya asina tambe parti di e desaroyo importante cu ta yegando den tur bario di Aruba. Nos ta hopi contento di por a complace cu e famianan di e bario aki.”
E mandatario a bisa alabes cu tur hende por mira cu poco-poco e trabounan pa Santa Cruz ta moviendo tambe. EL a menciona por ehempel fundeshi cu a wordo poni pa MFA Santa Cruz, a embeyece e plasa dilanti Misa Immaculada Concepcion, a pone iluminacion na Cas Ariba, Sabanilla Abou, Santa Lucia y awor Papilon. “Canando den e barionan di Santa Cruz nos ta haya mas peticion pa otro necesidadnan, manera verkeersplateau den diferente bario, mini cancha deportivo na Angochi a cuminsa. Den cada paso cu e gobierno aki tuma, nos ta purba di trece e calidad di bida cu nos kier pa tur nos ciudadanonan den cada bario. Sta. Cruz sigur ta mira tambe, unda nos curason ta y kico e dedicacion ta pa e barionan aki tambe.”
Gabinete Mike Eman II hunto cu Utilities Aruba NV a bin cu e maneho pa cumpra 12 mil luz LED di cual 9 mil ta pa cambia tur e luznan di caya convencional y e resto ta pa crea puntonan di iluminacion nobo pa barionan cu ta biba den scuridad. “E puntonan di iluminacion nos ta logra paga, door di reduccion di gastonan cu introduccion di e sistema LED cu ta gasta menos coriente,” Eman a bisa.
