Manera ta conoci, Uncle Louis Store ta participando den un competencia pa patrimonio cultural sostenibel, y e pueblo tin algun dia mas pa vota.
Mircla Nava, PR di Stichting Monuments Fund Aruba a bisa cu e nominacion aki ta hopi importante pa Aruba. Despues di e restauracion na 2019, a instala panel solar riba e edificio, ta recoge e sistema di awa di airco pa flush e WC, tin luznan LED na e bentananan original y varios cos mas. “Pa re uza un edificio riba su mes caba ta algo sostenibel, y tambe e tin aspectonan di sostenibilidad social cu e edificio a trece cu ne bek, dun’e bida atrobe den e centro di San Nicolas pa trece movecion den e area durante cu e edificio ta bashi, nos artistanan a haci uzo di dje,” Nava a splica.
Tin partinan pa recorda e funcion di e edificio, banda di esaki tambe a crea un sistema di oficina habri pa e edificio pa stimula contacto entre trahadonan. A tene cuenta durante restauracion pa trahado cu tin problema visual, anto a adapta e edificio tambe specialmente pa e persona aki. Esaki ta parti di e sostenibilidad social, y tur esaki ta haci cu e ta e edificio mas sostenibel na Aruba. Teniendo cuenta na reglanan estricto ora ta trata restauracion di un monumento, ta haci esaki un reto un poco mas grandi segun Nava a bisa. “Pero, e ta un ehempel tambe cu nos ta uza actualmente pa otro proyectonan manera Steenweg 19, ex botica Aruba, restaura recientemente, y tambe pronto cas Veneranda na Wilheminastraat 7.
Henter comunidad di Aruba por vota prome cu 24 di September pa asina duna e edificio e oportunidad di gana e ‘publieksprijs.’ Uncle Louis Store ta e unico edificio den Reino pafo di Hulanda participando hunto cu otro monumentonan, construi na 1951, cual awe ta e monumento di mas sostenibel na Aruba. Monuments Fund Aruba ta invita henter pueblo di Aruba pa vota pa nos monumento y demostra cu nos tambe ta orguyoso di nos monumentonan, cual ta conecta cu nos cultura, historia y herencia.
Pa vota, mester bay riba e siguiente link Stem Nu: Erfgoed Duurzaamheidsprijs of riba https://www.monumenten.nl/duurzaamheidsprijs.
Pa mas informacion: FB: Stichting Monumentenfonds Aruba IG: @monumentsfundaruba of www.monumentenfondsaruba.com
