“Ban lanta y planta” ta un causa pa salba naturalesa di Aruba, door di planta mas mata local posibel. Minister Ursell Arends ta un gran sostenedo di e causa aki. Porfin diasabra ultimo e inauguracion di BITE Forest na The Bucuti Tara – GMC Park a tuma luga, na unda a planta 30 mata pa asina crea un area protegi riba Aruba cual ta un iniciativa di Ewald Biemans di Bucuti y Tara Resorts.
Ban lanta y planta tin sosten di hopi hende activamente interesa pa un miho futuro pa nos hubentud y naturalesa. E fundacion tin hopi hende motiva cu tin amor pa restaura y cuida e poco naturalesa cu tin.
E parke ta un donacion di Ewald Biemans, cual tin aproximadamente 12 hectaria y a ser declara un tereno protegi. E conservacion ecosistema ta uno tipico Arubano cu un cantidad di 280 especie di parha, incluyendo warawara, shoco y prikichi. A planta un total di 30 mata endemico, awor e mata por crece y pronto nan lo produci oxigeno, absorbe CO2 y duna cuminda y refugio na parha.
Un gradicimiento ta bay pa e 3 plantado pa nan contribucion pa e creacion di BITE Forest y pa un Aruba berde y saludabel. Tambe ta gradici tur empleado y boluntario di Ban Lanta y Planta pa nan gran ayudo pa crea BITE Forest.
Planta mata ta un di e miho maneranan pa combati cambio di clima. Bo tambe kier planta un mata y haci Aruba mas berde? Por contacta Ban Lanta y Planta na https://www.facebook.com/BanLantayPlanta/
