Cu esey den men Aruba Tourism Authority (A.T.A) a ofrece un encuentro cu prensa diaranson mainta caminda a comparti di manera un poco mas concreto, algun di e plan y proyectonan pa 2023. Marisol Sanchez-Maldonado, como e PR & Communication Specialist tabata un anfitrion amabel mescos cu CEO Ronella Croes, Destination Services Manager Patrick Melchior y Chief Marketing Officer, Sanju Luidens.
E ocasion a tuma luga durante un desayuno na e restaurant Senses ubica na Radisson Blu, asisti pa varios medio di comunicacion, ademas di e ehecutivonan mas halto di e entidad incluyendo e recien apunta Director pa Nort America, Sjeidy Feliciano y Business Manager, Dyane Vis-Escalona.
A haya un actualisacion di e resultado obteni den 2022 cu ta posicion Aruba como e di dos destino den Caribe cu e recuperacion di mas halto post pandemia, ademas kico tur a haci den mantencion y ampliacion di facilidadnan rond di e isla. Tambe a anuncia algun proyecto pa 2023 incluyendo renobacion di trapi di Baby Beach y hende e area entre abou di Colony, ademas di Bike Trails cu ta resguarda e conservacion di areanan natural.
“Nos kier comunica mas tanto cu por cu comunidad. Turismo no ta un responsabilidad di ATA so, e ta un responsabilidad colectivo, pues di nos tur,” asina CEO di ATA, Ronella Croes a comenta cu e pensamento su tras di cu kizas por eleva e lazo cu prensa door di provee mas informacion, ya cu no ta tur informacion ta algo cu publico necesariamente ta mira den nan bida diario. Ta hopi importante pa comunidad sa kico tur ta e trabou cu ATA ta haci y pa apoya nan den e esfuersonan aki unda cu nan por.
