Den un ambiente hopi agradabel, SMAC, recientemente tabata tin un reunion cu e tumberonan pa asina repasa algun punto di preocupacion di e tumberonan.
Den e reunion, a pasa riba e premiacion cu lo bay duna, cual a keda di manda via email pa nan. Darren van Ommeren, presidente di SMAC a cuminsa na bisa cu a tende un tiki di e banda di e tumberonan, di kico nan ta pensa y kico nan ta desea riba loke ta husgamento y hurado. Unabes cu a envolve nan den e tumba, a yega n’e parti pa busca un presidente di hurado. Varios nomber a bin dilanti, di cual a scoge uno. SMAC lo reuni cu e persona aki diadomingo proximo, pa 10:00am. A haci un invitacion na tur esunnan cu kier participa den Festival di Tumba 2023, pa join SMAC na Plaza Betico Croes, pa disfruta y intercambia di idea hunto cu SMAC.
TIRAMENTO DI LOT
Dia prome di februari, SMAC lo tin inscripcion y tiramento di lot pa e Festival di Tumba 2023 na Balashi Beer Garden. Unabes cu tira lot, lo sa e secuencia di e tumberonan cu lo bay participa, pa nan sinti nan mes comfortabel pa e luga unda cu e festival ta bay ta dia 4 di februari.
Dia 2 di februari, e tumberonan lo mester entrega e letra na SMAC, pa na su turno pas’e pa e presidente di hurado pa e repasa esaki cu e huradonan. Y asina e preparacion ta sigui cana te dia yega 4 di februari den Balashi Beer Garden, pa e gran festival di tumba di Aruba. E ticketnan lo sali pronto
Manera cu SMAC tin e inscripcion, unda cu e tumberonan lo por haci uzo di e link pa nan inscribi. Asina ta sigur di e preparacion. Asina lo tin un bista di ken tur ta bay participa y cual ta e bandanan. Lo tin posiblemente nuebe pa dies banda y diestres cantante.
SMAC kier rebiba e tumba, pa cual ta involucra e tumberonan como tambe managernan di banda. Idea di esaki, segun van Ommeren, ta pa tur hende ta envolvi . laga tur hende tin parti den e desaroyo den e Festival di Tumba di Aruba.
Por ultimo, Darren van Ommeren, Presidente di SMAC, a gradici tur esunnan cu ta haci tur nan esfuerso pa haci e festival uno grandi. P’e simpel echo di mantene e Festival diTumba bibo!
