E ta oficial! SMAC a scoge cerbes Balashi como e cerbes oficial pa Carnaval 70. Balashi ta e cerbes mas gusta na Aruba, elabora cu masha orguyo localmente na Brouwerij Nacional Balashi, hunto cu Chill y Magic Mango. E compromiso aki ta refleha e conexion di Balashi cu e cultura autentico di Aruba y e temporada di Carnaval ta e momento di mas gusta di un pais cu ta rico den patrimonio y tradicion.
“Nos no por tabata mas orguyoso di ricibi e distincion aki for di SMAC, specialmente pa un Carnaval 70 cu ta asina anticipa, definitivamente e lo ta uno espectacular y nos ta orguyoso di forma parti di e celebracion aki. Aruba su Carnaval combina cu Aruba su cerbes ta un combinacion berdaderamente autentico”, asina Rowald Werleman di Brouwerij Nacional Balashi a duna di conoce, despues di a caba di firma e acuerdo cu Darren van Ommeren, presidente di SMAC.
“Ademas, 2024 ta un aña di celebracion pa Brouwerij Balashi mirando cu nos lo ta celebrando nos di 25 aniversario. Ki miho manera pa celebra 25 aña cu birando e cerbes di Aruba su Carnaval 70”, asina Werleman a agrega.
Brouwerij Nacional Balashi su dedicacion pa preserva cultura di Aruba ta cuminsa cu esfuersonan sostenibel p’e isla en general. Tur esaki ta destaca pa medio di nan exclusivo campaña di bottle-return cu ta e unico campaña di e estilo aki riba nos isla. Balashi ta curasha tur carnavalista pa tene nos cayanan limpi y warda e boternan bashi pa ricibi 4.80 florin pa caha of paketa bo cooler cu blekinan di Balashi, Chill of Magic Mango.
Cheers pa un Carnaval sigur…y manera semper, bebe na un manera responsabel.
