Desde e periodo di COVID te cu awo, AZV ta sigui brinda servicio online. Tur persona cu tin un pregunta riba AZV, renoba carchi, por haci esaki via e email [email protected], pero tambe ta recorda tur asegurado riba e AZV app. Clientenan por download e AZV app, registra na dje y tin nan digitzorgpass. E proceso aki ta uno facil y den algun minuut cada persona por registra su mes.
Solange Tchong, Relacionista Publico di AZV, a bisa cu asina aki semper e persona tin su digitzorgpass pasobra mayoria di hende ta cana cu nan celular y semper por presenta e zorgpas. Pa AZV esaki ta e innovacion di mas positivo cu a bin durante e pandemia, aunke cu nan ta den e trayecto di bin cu mas servicio digital.
E periodo aki a acelera AZV su servicionan y ta sigui cu ne ya cu el a bay bon. Tin cliente cu a tuma contacto cu AZV informando di no tin opcion pasobra por ehempel nan no tin computer na cas, no tin internet, etc. pero a keda e opcion pa e clientenan aki di por yama pa haya un cita cu AZV.
Nan ta keda stimula e servicionan digital, cual ta uno hopi facil, y ta facilita hopi mas. Mayornan por añadi nan yiu(nan) den e mesun AZV app. Segun Tchong, e mayor por registra su mes, pero na mes momento registra e yiunan. Tambe esnan cu ta cuidado di un hende grandi of cuida un hende cu nan ta busca remedi p’e na botica, nan por pidi pa añadi otro persona. Tin cu manda un email pa ricibi instruccion pa añadi e persona cu uno ta responsabel p’e y yuda cu su AZV.
