Diadomingo, despues di un exitoso Parada di Carnaval di Mucha na San Nicolas, manera ta custumber y tradicion, a kima momito den Carnival Village na San Nicolas. Pero, prome cu kima “MOMITO” e prins y pancho infantil y hubenil ta lesa e testament cu a keda atras.
“Mucha- y mayornan, e momento a yega pa mi por duna mi pensamento y laga atras mi testament. Prome cu tur cos mi kier a felicita mi Mama/machi Carnaval cu su 70 aña y bis’e cu no worry paso mi ta mira cu e lo t’ey pa hopi tempo mas cu nos. Mi a mir’e ta gosa y baila, ma wak e yora y hari, te hasta ma bira jaloers ora cu hopi hende a bras’e pa e por lanta para y luci mas cu nunca e aña aki. Pabien Machi y Aruba completo. Despues di a drumi masha tiki ora den weekend aki, machi a bisa mi cu mi mag di duna mi pensamento y yuda guia carnaval di nos muchanan.
Awo como Rey di caminda mi ta cla pa duna mi testament infantil/hubenil pa Carnaval 70. SMAC mi sa cu hunto nos traha pa sigui haci nos Carnaval di Mucha mas grandi ainda. Momito a sinta cu hopi hende pa papia di Carnaval di Mucha, Momito a lesa hopi comentario pa por compronde kico tur hende ta desea y esaki ta mi conclusion.
Parada luhoso y yena di fantasia
Momito a keda hopi contento cu carnaval di nos muchanan, mi a mira un parada yena cu fantasia y hopi luho y cu hopi mucha gosando.
Pa otro aña cu no ta un aña di celebracion grandi Momito kier mira mas scol y bario participa den parada di mucha pa asina No laga e gruponan bira menos. Mayornan, lidernan ban sigui yuda e gruponan y scolnan pa sigui engrandece paradanan di mucha.
Mucha chikito laat anochi riba caya
Momito ta un poco tristo si, paso mi a mira hopi mucha hopi chikito den oranan di anochi laat riba caya. Momito ta desea pa por pone un centro di straf pa mayornan cu no tin horea y cu no ta mira e peliger cu tin den anochi laat cu nan yiuchinan riba caya. Altocomisario mester pone algun di su special force atende cu esaki. Momito lo pidi SMAC pa yuda cu extra machine di swipe pa e multanan. Pero MAYORNAN no bay paradanan di hende grandi cu nos muchanan bou di 8 aña.
No forsa un mucha pa bay den parada
Durante di e paradanan di mucha tambe momito a mira hopi mucha ta yora paso nan no kier baila den parada y tabata haya zundra di nan mayornan. Momito ta hopi feliz cu mayornan kier haci momito orguyoso, pero no forsa nan. Laga nan bay e paradanan chikito prome pa despues bin e fiesta grandi mes riba caya cu MOMITO y su amiguitonan.
Mas participacion di scolnan den parada escolar
Momito a gosa hopi durante parada escolar y kier a bisa danki na e scolnan cu a participa y tambe na tur e bandanan cu a acompaña e scolnan. Mi ta desea di mira mas scol y tambe den parada grandi mucha.
Zonido hopi duro
Durante parada Momito ta sigui mira muchanan bailando hopi cerca di speakernan y esey ta haci mi tristo atrobe paso no ta tene cuenta cu e oido di nos muchanan. Aplauso pa e gruponan cu ta parti earplugs pa nan muchanan y tambe pa e mayornan cu ta cumpra nan earplugs pa e muchanan bisti ora nan ta para canto di caminda. Corda mantene bo mes 7m leu for di speaker y earplugs obligatorio.
Harimento ta pone bo keda jong
Momito gusto hari paso e ta haci momito keda jong pero tambe mi kier mira mas participacion di Prins cu Pancho. Momito kier bay den tur e scolnan of clubnan deportivo den tur bario pa duna les di actuacion of di conta joke. SMAC mester pidi permiso pa por haya docentenan of x prins cu panchonan pa yuda cu cursonan pa e muchanan. Momito ta desea pa pidi boso motiva nos muchanan. Prins cu pancho ta esunnan cu tin e yabi y ta dirigi carnaval. E ta un figura importante. Mi no kier mira coronacion di dos pareha so pa otro aña, sino hopi pareha cu hopi premio bunita y cu respet pa tur categoria pa nos muchanan y hobennan.
Contento cu tabatin mas reina infantil y hubenil
Mi a hera muri dood ora cu mester a cuminsa eleccion di Reina infantil Hubenil hopi laat. Momito ta contento di mira mas Reina infantil y hubenil participando pero SMAC corda riba e pañanan di carnaval mas tempran. Momito lo pone su cosedonan stand bye pa Carnaval 71 y cu e mashin di SWIPE si SMAC no cumpli.
Parada Di Mucha: Laga nan gosa
Momito gusta con nos muchanan ta baila den paradanan di carnaval pero si mi kier a pidi mayornan y leidsternan pa no stroba e mironesnan cu kier mira e muchanan luci nan paña. Tin grupo cu asina hopi leidster of mayornan cu ta baila riba e muchanan cu bo ta perde e fantasia for di bista. Lidernan di grupo, please controla esaki.
Musica ta bida
Momito a lesa y scucha hopi critica cu no ta laga nos muchanan canta den parada nan cancionnan di Tumba of Roadmarch, Mi a mira cu den paradanan di muchanan y escolar mas mucha a canta. Hopi contento pero, please bandanan si por train of maske acepta e pista pa wordo graba den studio pa asina nos muchanan por canta durante paradanan momito lo gosa mas ainda di Carnaval. SMAC por pone esey como premio pa haci grabacion den studio. Y DANKIIIII na tur banda cu a laga nan canta.
Pabien na ganadonan cu ta pone musica y ambiente den Carnaval
·
-Tumba
· Tumba Inf: “B’a Flecha mi curason”
· Tumba: Hub: Den nos Cos”
· Calypso Inf: Duna nos Amor
· Calypso Hub: Giva thanks and Praise
· Roadmarch inf: Colors
· Roadmarch Hub: Arubian sauce
Bisa danki
Momito no ta lubida e conseho di nos prins y pancho infantil cu ta bisa :
Aruba, e aña aki nos kier pa tur hende uza e palabra “Danki”.
Mescos cu nos ta bisa danki cu nos ta lanta tur mainta.
Danki pa nos mami y nos papi.
Danki pa nos juffrouw y meneer nan.
Danki pa nos famia.
Danki cu nos tin un cas y nos tin cuminda.
Mami y papi, corda bisa nos danki, ora nos haci un fabor. Esey ta laga nos curason sinti bon.
Momito tambe kier bisa danki na nos prins y panchonan y danki na nos Reina Infantil Xeena Dijkhoff y Reina Hubenil Jaylienne Tromp
Corda semper pa bisa Danki! Danki ARUBA pa nos Carnaval 70
Educacion ta principal
Tambe e mensahe di nos Prins y Pancho Hubenil unda nan ta pidi pa hobennan keda demostra disciplina, keda semper uni, keda cu bo creencia spiritual, keda como hoben humilde y inspirativo. Yuda den ideanan innovativo y kere den bo mesun potencial y duna respet pa ricibi respet.
Bo termina bo estudio mas cu tur cos y no benta bo hubentud afo. Corda cu bo exito no ta di bo so sino di bo mayornan, amigonan y henter bo PAIS!
Tur mucha y hoben a yuda haci carnaval inolvidabel
Momito kier a sigui conseho di Prins y pancho infantil y bisa gracias, thank you, van harte bedankt, Graci’e, danke, xi’e xi’e (sieye sieye) obrigado, masha danki mes mes, Na tur nos muchanan y hobennan cu a yuda haci nos carnaval inolvidabel, tur cu a participa y tambe esunnan cu a gana.
Momito ta bay cu tur e cosnan malo cu por a pasa di nos carnaval aki pero ta laga boso tur pa yuda otro pa mehora carnaval 71. Corda sigui representa Carnaval durante henter e aña , unda cu boso bay keda saca cara di nos mucha- y hobennan. Te despues mi amigonan Arnold, Jayven, Cayle, Edan, Xeena, Jaylienne , Ian, Jetzenia, J-Vyon, Zenae, y Ivy-Ann y tur e gruponan participante… tur carnavalista infantil y hubenil. Danki pa boso presentacion
Awo si mi ta cla pa boso kima mi, y corda brasa otro, stima otro, no bully, no kibra nos gana di carnaval, engrandece cu tur cos cu por y danki na tur e gruponan cu a haci nos carnaval di mucha grandddiiii y bunita…. te otro aña.
