Avond Mavo Aruba no tin mucho cambio pa loke ta inscripcion. Normalmente alumnonan ta inscribi online y despues ta entrega e documentonan na oficina di Avond Mavo. E biaha aki, pa evita aglomeracion, lo mester entrega documentonan online.
E documentonan necesario ta copia di identificacion, papel di Censo, copia di rapport of SCK, cual mester entrega tur online, asina Natalie Geerman, director di Avond Mavo Aruba a bisa. Ora cu COVID-19 a cuminsa mester a tuma tur les den distancia. Esaki a nifica cu tur cos custumbra den klas a bay for di distancia.
Varios docente a cuminsa experimenta diferente manera pa duna les. Esaki a pasa den e prome periodo, pero den di dos periodo scol por a habri bek. E alumnonan por a regresa scol y por a nota cu nan tabata contento, segun Geerman. Aunke cu scol a cuminsa, ta pendiente cu cosnan por cambia un biaha mas y mester bay bek na duna les di distancia. E director a indica cu ta spera di ta bon prepara prome. Pa hopi scol esaki a bin di sorpresa y nan no kier haya e sorpresa aki. A base di e situacion nan kier prepara p’e aña escolar nobo.
Ta avisando e alumnonan cu si no tin acceso na internet, laptop of otro aparato, pa nan pensa bon si nan ta bin e aña escolar nobo. Esaki ta bin si acaso dicidi cu scol no por habri mes, lo tin cu duna les di distancia y e lo tin su consecuencianan. Pa drenta Avond Mavo mester tin edad, pasobra si ta menos cu 16 aña e ora no ta bon pa bay scol di anochi sino den dia. Esaki ta pa motibo cu durante scol den dia e alumno ta haya mas yudansa y mas oranan di les cu ta mas miho. Riba e website di Avond Mavo por haya tur informacion, di cual tin klasnan 2, 3 y 4.
Nan ta orguyoso cu 4de klas, pasobra a topa cu hopi reto. A logra haya 69% di graduado y esey ta algo bon pa Avond Mavo. Ainda tin alumnonan cu por gradua door di e resultaat verbeterings toets (RV toets). Un grupo grandi di alumno cu a inscribi p’esaki y tin chens di mas graduado. P’e otro klasnan ainda falta reunion di rapport y lo tene na cuenta cu e situacion di COVID-19 pa asina mira con e resultado p’e aña tabata.
