Awe, 14 di april, pa 2:00 pm ta asina leu cu caso Avestruz ta finalisa su proceso den prome instancia. Riba e fecha aki lo tin ceramento di e caso y e hues encarga, cu a bin for di Hulanda specialmente pa e caso, lo dicta sentencia.
Avestruz ta un caso cu a dura rond di tres aña prome cu esaki a yega na corte. Na momento cu e caso a yega corte a resulta cu e abogadonan di e diferente sospechosonan a bisa cu ta imposibel cu den un luna di tempo nan por repasa 22 mil formulario pa ta cla pa e Regie Zitting. Tabatin diferente sesion cu a tuma luga prome cu e tratamento profundo a inicia. Asina mester a haci diferente investigacion y interogacion di testigo prome cu finalmente e caso tabata cla na september pa cuminsa cu su tratamento.
Avestruz ta un caso di corupcion cu tereno publico, labamento di placa y soborno. Tin 11 sospechoso envolvi parti den grupo, basa riba e rol cu nan a hunga. Tabatin esunnan cu a pidi un of mas tereno y cu ta acusa nan di a saca probecho door di bende esaki, bou di capa di benta di shares di un compania, ganando placa. Algun otro a actua como intermediario of tabata traha cu e propio ex-mandatario y a pusha p’e amigonan haya tereno den forma hopi rapido, na opinion di Ministerio Publico.
A acusa e ex-mandatario mes di a coopera den e schema aki, cu supuestamente el a haya fabor of beneficio a cambio, di a haci mal uzo di e fondonan di su fundacion politico etc. E tratamento aki a tuma hopi tempo, for di september te cu 10 di november, 2022, ora cu Ministerio Publico a yega na turno pa haci su demanda.
Den e caso di Benny Sevinger a pidi un castigo di cinco aña y na mesun momento a pone e condicion cu pa 10 aña e no por subi lista politico ni ocupa un funcion den gobierno. Esaki ta un castigo mas di loke a duna na ex-minister Paul Croes, kende ta sintando su castigo den KIA.
Den e caso aki no a pidi boet, pasobra Ministerio Publico ta cuminsa un caso na banda pa kita propiedad for di dje pa e probecha cu e lo a saca den e caso aki. Ta papia di un suma di casi un miyon florin. Su abogadonan ta mr. Illes y mr. Kock.
Pa Curt Harms (representa pa mr. Vito Carlo), a pidi un castigo den forma di trabou pa comunidad, esta 100 ora of 50 dia cera y un boet di 25 mil florin. Carlo den e caso aki a bisa cu Ministerio Publico a bruha entre Curt Harms bieu y esun hoben.
Franklin Abath, ex-director di DIP y miembro di Management Team, lo a yuda den e proceso pa algun “amigo di partido berde” haya tereno den un forma rapido. P’e nan a pidi un castigo di 6 luna, kitando e 31 dianan cu el a pasa deteni. Su abogado ta mr. Maldonado.
Frederick Every, asisti tambe pa mr. Vito Carlo, tabata traha directamente cu Benny Sevinger. E tabata encarga cu e personal di e mandatario. Pues a yuda pasa e papelnan p’e minister of a pone nan mas ariba den e stapel. P’e nan a pidi 160 ora di trabou pa comunidad of 80 dia cera.
E personahe di radio conoci Leoncita Arends, tambe ta un di e acusadonan. Su rol tabata mas grandi, esta di a haya tereno di pueblo y a haci negoshi cu nan. P’e acusado aki, kende ta representa pa Doris Canwood, a pidi un castigo di 3 aña di prizon, kitando e 46 dianan cu el a sinta caba y un boet di 25 mil florin.
Pa su yiu muhe, Reina Rebecca Richardson (representa pa mr. Zuhaila Arendsz-Marchena), a pidi pa declar’e culpabel y un castigo igual na loke el a pasa deteni caba.
Tin e caso tambe di Mary Winterdaal, kende a bay biba na Hulanda pa motibo di salud, a pidi pa declar’e culpabel pero sin castigo. E acusado aki ta representa pa mr. Emerencia y mr. De Hoogd.
Pieter Susebeek, segun Ministerio Publico a bira multimiyonario cu tereno di pueblo. Su abogadonan mr. Illes y mr. Kock a represent’e den corte. Ministerio Publico a pidi un castigo di 4 aña, kitando e 34 dianan cu el a pasa cera y verbeurt e suma di placa cu e tin un cuenta di Orco Bank.
Ministerio Publico mes a pidi pa declara hotelero Ewald Biemans liber di e acusacionnan haci contra dje. Un demanda cu su abogado mr. Oomen a pidi corte pa ratifica.
Gaby Werleman y su pareha, Ninosca Nuñez ta representa pa mr. Oomen. Pa ambos a pidi 2 aña, kitando loke nan a sinta caba y un boet di 25 mil florin.
Carlo Mansur, representa pa mr. Vito Carlo, a haya un tereno pero a bisa cu e no a pidi fabor pasobra nunca el a topa cu e mandatario, aunke cu e tabata forma parti di e hala hubenil di partido berde. A saca probecho di benta di un tereno di gobierno cu el a haya, pa 1.3 miyon dollar y pa cual a pidi un castigo di 2 aña y un boet di 25 mil florin.
E D-Day pa e grupo aki ta awe y te awo ningun hende por bisa ki direccion e caso aki lo tuma.
