Hunta di Supervision di Aruba Airport Authority NV, Gobierno di Aruba y Schiphol Group lo reuni awe na Aruba pa dicidi riba posibel prolongacion di e contract pa operacion di nos Aeropuerto. Riba mesa tin un conseho pa prolonga e contract pa 5 aña mas. Si partidonan yega na otro, lo nifica continuacion normal di e proyecto “Gateway 2030”, cu ta nifica un inversion di mas o menos US$ 275M.
Aeropuerto a para proyecto di ampliacion
Na momento cu e institutonan financiero a conseha pa laga Schiphol Group mes keda na timon di e proyecto di ampliacion, e compania cu base na Hulanda a opta pa mitiga su risico y a laga para e proyecto. E no por garantisa calidad den e proyecto si na contract ta vence dia 1 di september 2018.
Schiphol Group a inicia un acuerdo di cooperacion y operacion di nos terminal di Aeropuerto desde aña 2004, tempo di Ing. Edison Briesen como Minister di Turismo y Transporte. Conseheronan cerca di Ministernan a sigura cu esaki lo bira e ultimo prolongacion, pasobra ta opta pa educa un local pa tuma aeropuerto over.
Demanda Schiphol Group
Tur negociacion ta bin cu su presion y deseonan na ambos banda di mesa. Schiphol Group por ehempel ta desea un representante den Hunta di Supervicion di Aeropuerto. E mesun peticion a haci tur e ultimo añanan sin cu nunca Gobiernonan a acorda.
Nombra miembro nobo den Hunta di Supervision
Manera ta conoci, ya ta algun luna caba cu Rafael Croes a haye ta bandona e puesto di Presidente na careda. Otro miembronan den e Hunta a demostra di no tin confiansa mas den dje. Den apenas 6 luna na mando como Presidente di e hunta, ya e mester a baha. No a nombra niun otro miembro na su luga. Tambe mester eligi un Presidente nobo debi cu esey no tin. Marion Kan, cu den pasado tabata Presidente, awor ta Vice Presidente y ta encabesando e directiva. Awe lo mester bin claridad riba e miembro cu falta y aloca e funcionnan.
Agenda awe
The Schiphol Group lo topa cu Prome Minister Evelyn Wever-Croes awe mainta y su tras cu e Hunta di Supervision di Aruba Airport Authority. Den e reunionnan aki lo mester dicidi si ta prolonga e acuerdo y bou di ki condicionnan. Tambe mester dicidi riba prolongacion di e contract cu James Fazio como Gerente General, prome cu su contract vence e siman aki.