Den e recorido na tur skina di Aruba, nos reportero a bishita varios luga unda cu ta pidi pa auxilio di parti di autoridad, pa sea dump ilegal, pero tambe caminda den mal estado. E biaha aki nos reportero a bay na Santa Lucia, unda cu e caminda ta practicamente inaccesibel.
Nos mesa di redaccion a haya varios yamada pa nos bay n’e caminda di Santa Lucia. Riba e imagennan por mira e caminda di santo, unda cu despues di awasero fuerte, a forma rooi grandi y hunto, causando buraco den caminda. Esaki ta haci cu e autonan no por pasa.
E habitantenan ta pasa trabao pa yega na nan cas. Auto chikito, unda cu casi casi nan ta keda sin shocks, sin taira.
Tambe por a nota cu na final di e caminda di santo, ta sigui e caminda di asfalt, unda cu ya el a coba asina tanto, por mira practicamente con halto e asfalt ta, ora cada auto dal den e parti aki, unda cu por kap e tairanan di e auto.
Riba e sero di santo na Santa Lucia, e automobilistanan ta pasa trabao pa baha esaki. E habitantenan ta pidi DOW pa por fabor bin tira un bista. Nan ta na altura cu tin hopi otro caminda di santo cu ta destrosa pa motibo di awasero fuerte.
Pero ta pidi pa por fabor no lubida riba e habitantenan di Ayo/Santa Lucia, caminda e sero di santo aki ta.
