Damnan rond Aruba pa algun tempo caba ta den noticia pa motibo di secura. Departamento di Agricultura, Cria y Pesca Santa Rosa na varios ocasion a duna diferente entrevista y informacionnan por medio di comunicado kico ta pasando p’asina nos productornan ta bon na altura na momento cu bay recoge awa na Dam.
E fenomeno cu semper ta keda un discusion ta e esun cu trucknan di companianan priva ta haci uzo di e awa di dam pa otro propositonan cu no ta agricultura. Semper tin un of mas di e companianan aki cu no ta duna respet na e peticion cu na mas cu un ocasion Santa Rosa ta haci. Practicamente tur dia tin di e trucknan aki ta coy awa for di Damnan rond Aruba sin tene na cuenta e secura cu agricultornan ta pasando aden.
Santa Rosa mes a yega di haya notificacion di bisiñanan cu ta bisa cu tin cierto trucknan ta coy awa na Dam. Na varios ocasion tambe personal di Santa Rosa a yega di experencia esaki. Tambe nan ta bisa cu a yega di pone diferente aviso na Damnan, pero esaki tampoco no ta yuda. Awendia cu tin pagina di medianan social por tuma nota tambe cu esnan cu tin agricultura na curason ta saca potret y ta pone esaki riba p’asina nan pone nan comentario di desaprobacion total di companianan priva cu ta coy awa na Dam.
Ta di lamenta cu toch ainda esaki ta sigui pasa mirando cu Aruba ta den un periodo di secura pa varios aña caba. E tiki awa cu ta yobe den e temporada di october, november y december no ta suficiente pa por yena tur Dam rond Aruba. Manera a yega di remarca den otro comunicadonan cu ultimamente e awasero cu ta yobe ta na cierto parti di Aruba so y tin biaha mas duro cu kisas otro partinan cu awa no ta yobe mes. Den otro palabra Aruba pa varios aña caba no a haya un torencial awasero pa yena tur Dam rond Aruba.
Mirando e ultimo acontecimentonan na diferente Dam rond Aruba cu diferente companianan priva cu trucknan septico ta coy y mal uza e awa cu ta destina pa agricultura, ta cuminsa haci advertencia. Na varios ocasion por tuma nota cu trucknan septic ta keda haci esaki di cual na un sin fin di cantidad di biaha Santa Rosa a y ta keda haci e apelacion pa no uza e awa aki pa otro proposito cu no ta agricultura. Toch ta keda mira esaki ta tuma lugar. Esaki ta bay asina leu cu esnan cu tin agricultura pa pecho ta reporta esaki riba medianan social caminda nan ta pone potret di locual nan capta na e momento ey of tin biaha ta yama Santa Rosa pa avisa kico ta tumando luga. Pero esaki tampoco no ta yuda.
Esaki ta netamente e motibo cu Departamento di Agricultura, Cria y Pesca Santa Rosa a tuma un decision pa pone avisonan na algun Dam y wak si esaki por wordo respeta. E Damanan cu e avisonan a wordo poni ta Dam di Rooi Afo, Dam di Hooiberg di cual tuma nota cu e borchi di aviso a wordo kibra sin ningun motibo.
Dam di Pal’i Boonchi patras di Weng Kee Supermarket na Piedra Plat, Dam di Cas Ariba na Santa Cruz, y e Pos di Awa na Savaneta. Sta Rosa ta haci un apelacion pa tuma bon nota di e avisonan aki y respeta nan. Esaki ta pa controla y purba na regula uzo di awa di Dam. Esaki ta duna espacio na mas di nos agriculornan por beneficia di e awa aki na un miho forma posibel.
