“Ta increibel cu Gabinete Wever-Croes ta pone den presupuesto cu ta bay ranca 10 miyon for di WEB/ELMAR mientras cu entrante 1 di october ta aumenta prijs di awa y coriente cu 30%. Esaki simplemente ta un abuso di marca mayor”, asina e lider di fraccion di AVP, mr. Mike Eman a expresa despues di a bati alarma tambe na Gobernador pa e inhusticianan cu Gabinete Wever-Croes ta cometiendo en contra di e pueblo.
Eman no por compronde con ta hustifica e aumento barbaro aki di awa y coriente, pasobra WEB/ELMAR ta den un abismo financiero, pero di otro banda sin ningun berguensa ta pone den presupuesto cu WEB/ELMAR lo mester paga gobierno 10 miyon na dividendo.
Den e bishita- y reunionnan di bario e lider di fraccion di AVP mr. Mike Eman ta bisa cu e ta haya confirmacion di e pobresa y di e dolor den pueblo. “Costo di bida ta subiendo den un forma alarmante. Ta obvio cu e medidanan cu Gabinete Wever-Croes a implementa durante e ultimo añanan a impacta e cifra di inflacion severamente. Na 2017 ainda inflacion tabata menos cu 0%, esta – 0.6%. Na 2018 y 2019 esaki a subi drasticamente cu e medidanan di Gabinete Wever-Croes. Redoblacion di BBO y e echo cu e BBO a wordo poni tambe riba diferente otro cosnan cu tabata exonera, manera transacion bancario y seguro, a crea un efecto inflatorio adicional. Riba gasolin y diesel e impacto tabata dobel, 12%. Tambe e eliminacion di e descuento di 10 cent pa liter di gasolin y diesel tabatin un efecto negativo grandi”. Tur esaki, segun e lider di fraccion di AVP, ta haci Gabinete Wever- Croes responsabel pa e pobresa alarmante cu tin na Aruba. Riba tur eskai awor ta bin aumento di awa y coriente cu 30%, paga pa remedi y aumento di BBO cu lo haci BBO en total 21% riba mayoria producto na Aruba. Alarmante di esaki ta, segun Eman, ta mustra cu den 2022 inflacion ta sigui e rumbo preocupante. Inflacion acumula door di medidanan di Gabinete Wever-Croes tin un impacto dramatico riba costo di bida.
Cifra di CBS ta confirma e aumento drastico aki. Segun e cifranan di CBS, e bestaansminimum pa un persona pa luna na december 2017 tabata 2.066 florin y na juli 2022 esaki a bira 2.440 florin, casi 500 florin mas pa luna pa bo por sobrebibi. E bestaansminimum na 2017 pa 4 persona, 2 adulto y 2 mucha tabata 4.338 florin y awor e ta 5.124 florin casi 800 mil florin pa luna mas pa bo por sobrebibi. Eman ta bisa cu e panorama socio-economico hustamente ta mustra un deterioro e ultimo añanan, es decir cu e 800 florin aki mas di gasto mensual ta pone cu nos pueblo ta empobreciendo na un forma alarmante.
E lider di fraccion di AVP mr. Mike Eman ta bisa cu desde 2017 pa 2022 no tabata tin ningun ahuste structural di apoyo pa e poder di compra di comunidad. Alcontrario cu e medidanan y ausencia di coreccion ta atras e poder di compra a keda bay di 2018 pa 2022. Cifra di Banco Central y CBS ta confirma esaki. Aruba ta empobreciendo den un forma penoso y alarmante. Riba tur esaki ta keda chica tur locual por chica pa paga pa beneficionan lucrativo pa amigo y famia di Gabinete Wever-Croes. Eman ta enfatisa e necesidad pa un cambio y ta mustra cu e Aruba tin mester di un gobierno cu ta bay pone e BON COMUN atrobe como prioridad.
