“Te ainda e Comision di Apelacion (Beroepscommissie) no ta cla cu nan decision y nos ta duna nan e tempo necesario pa por ta riba un solo liña den nan forma di interpreta nos reglanan”, asina Ing. Richard Dijkhoff, Presidente di Arubaanse Voetbal Bond (AVB), a duna di conoce un rato pasa. Consecuentemente a dicidi di pospone e wega di awe nochi entre SV Estrella contra Dakota. “Si e comision keda cla pa mañan diasabra y tin un desicion, nos lo hunga e wega e ora riba diadomingo, dependiendo di e posibilidadnan pa por organisa esaki”.
E campeonato di Division Honor 2017/2018 ta den su momentonan culminante. Despues di 18 wega di e campeonato regular, awor tin 4 team, esta Coca Cola Nacional, SV Dakota, SV Britannia y SV Estrella, cu a yega semi final.
Sinembargo, dialuna ultimo SV Britannia a entrega un protesta, pa motibo cu den nan concepto durante e wega a uza un hungado ilegal. E directiva di AVB a trata e protesta aki corectamente. A base di documentonan y conseho legal di partnernan internacional FIFA y CONCACAF, e organisacion local AVB a tuma e decision cu SV Britannia no ta hanja rason den e protesta. AVB ta sigura e fanaticada grandi di futbol cu nan ta actua corectamente, segun e reglamentonan cu tin y ariba consehonan di FIFA y Concacaf.
Despues di e decision di e directiva di AVB, SV Britannia a apela na “beroepscommissie”. E comision independiente di AVB, cu ta conta cu 7 miembro, di cual tin hurista y abogadonan, ta atendiendo e apelacion. Tur hende por ta trankil cu na final, ora tuma un decision, cu por confia cu lo ta esun miho y cu esaki lo mester keda respeta.
AVB ta invita fanaticonan pa mañan diasabra pa 7:00pm na Stadion Guillermo P. Trinidad, pa e wega entre SV Britannia y Deportivo Nacional. Ta invita fanaticonan pa yega stadion y admira e weganan y pa keda pendiente si lo tin un wega adicional riba diadomingo e siman aki ainda.
