AVB a entrega “Women’s Football Development Program” na FIFA y CONCACAF

Despues cu Arubaanse Voetbal Bond (AVB), bou liderazgo di su presidente, ing. Richard Dijkhoff, a finalisa y aproba e programa pa desaroya futbol femenino na Aruba, siman pasa a entrega un copia na e organisacion mundial FIFA y esun Americano, esta CONCACAF. Durante e recien congreso di CONCACAF na Miami, e organisadonan a crea un momento pa asina AVB por a haci entrega di e “Women’s Football Development Program” na president di Fédération Internationale de Football Association (FIFA), Gianni Infantino y na president di Confederation of North, Central American and Caribbean Association Football (CONCACAF), Victor Montagliani. 

E “Women’s Football Development Program” aki ta un plan cu tin prescribi con AVB lo desaroya futbol femenino na Aruba den e añanan nos dilanti. E plan aki ta hopi importante pa motibo cu, banda cu esaki ta un exigencia di FIFA pa AVB por bin na remarca pa fondonan, e plan aki lo trece claridad pa un y tur unda AVB kier hiba futbol femenino. Manera menciona anteriormente, sin e plan aki AVB lo no por ricibi fondonan pa desaroya futbol femenino.

Ing. Richard Dijkhoff ta conta cu sosten di e dos figuranan mas importante di futbol mundial. Di robes pa drechi por aprecia Gianni Infantino, presidente di FIFA, Dijkhoff di AVB Aruba y Victor Montagliani, presidente di CONCACAF. Ambos a yega di bishita Aruba caba den pasado. Nan ta considera AVB y Richard Dijkhoff como rolemodel pa henter Caribe!

Kisas hopi ta pensa cu FIFA ta simplemente aloca fondonan disponibel pa AVB haci kico cu kier pero esaki absolutamente no ta asina. Pa por bini na remarca pa fondonan di FIFA, mester entrega plan- y programanan pa FIFA tin un idea den kico ta inverti su fondonan. Ningun proyecto no por inicia sin aprobacion di FIFA y of CONCACAF y pa e motibo aki  ta importane pa entrega tipo di plannan manera esun di Women’s Football Program. 

Esaki ta e unico manera cu AVB por bini na remarca pa fondonan pero tambe pa asistencia caminda cu tin mester. Na e momentonan aki AVB ta trahando hopi di cerca cu expertonan di FIFA y CONCACAF pa prepara e ehecucion di e plan aki pero tambe ta ricibi asistencia di e departamento di futbol femenino di Koninklijke Nederlandse Voetbalbond (KNVB). 

Giovanni Vincenzo “Gianni” Infantino di 51 aña di edad ta un administrado di futbol y ta e di 9 presidente di Fédération Internationale de Football Association (FIFA), eligi dia 26 di februari 2016. E ta e prome Italiano pa ocupa e puesto di Presidente di FIFA. E ta naci na Suisa, di un mayornan Italiano cu a inmigra eynan. El a studia ley na University of Fribourg y ta domina e idiomanan Italiano, Frances, Aleman, Ingles, Spaño y Arabia. Prome di asumi e puesto den FIFA, e tabata e Secretario General di Union of European Football Associations (UEFA) desde aña 2009. Gianni Infantino ta casa cu Leena Al Ashqar di Lebanon. E pareha tin 4 yiu.

KNVB, despues di a traha ampliamente riba desaroya futbol femenino pa algun aña, awe tin e titulo di campeon di Europa y sub-campeon di mundo. Tur e ayudonan aki no tawata posibel sin e contacto di ing. Richard Dijkhoff, president di AVB, cu e instancianan aki. 

E “Women’s Football Program” aki tambe ta parti di e plan integral “Grow Football Aruba” di AVB. E plan ta pa desaroya e 8 areanan den futbol na Aruba. Esunnan cu ta den pleno ehecucion na e momentonan aki ta: 

  1. Club Development Program 
  2. Coach Development Program 
  3. Talent Development Program
  4. Referee Development Program 
  5. Lo inicia cu e Women’s Football Development Program 

E otro tresnan cu ta den e proceso di finalisacion ta: 

  1. National Team’s Development Program 
  2. Facilities Development Program 
  3. League Development Program. 

Esaki ta programanan cu lo mester desaroya futbol na Aruba di tal manera pa asina eleva, no solamente nivel di futbol, pero tambe di tur locual ta importante rond di futbol.  

Victor Montagliani di 55 aña di edad ta un comerciante Canades, na cabes di Confederation of North, Central American and Caribbean Association Football (CONCACAF) desde 12 di mei 2016. Prome cu esey e tabata presidente di e asociacion di futbol di Canada. E tin un aprecio masha grandi pa AVB y ta considera ing. Richard Dijkhoff un amigo personal di dje.

Pa CONCACAF, e plan aki tambe ta importante pa motibo cu a base di esaki nan lo sostene AVB pa yuda desaroya futbol femenino na Aruba tambe. Tanto e president di FIFA como esun di CONCACAF, despues cu nan a ricibi copia di e plan, a expresa cu nan ta sumamente contento cu e esfuerso- y trabounan cu ta ser haci pa desaroya futbol na Aruba. 

Alabes ambos president a felicita y elogia ing. Richard Dijkhoff pa e bon trabou cu el a bin ta haciendo pa futbol na Aruba. Por ultimo, tanto Gianni Infantino como tambe Victor Montagliani, a menciona cu AVB, pa tanto FIFA y CONCACAF, ta ser considera como un rolemodel pa e demas federacionnan cu ta forma parti di CONCACAF pa locual ta trata e forma cu AVB a bin ta desaroya futbol.

Noticia relacionaMas for di e autor