Aquannette Gunn (MAS): Minister a bin cu decision iracional

Pakico e Minister demisionario di Enseñansa, Ciencia y Desaroyo Sostenibel, dr. Armando R. Lampe a tuma e decision pa entrante aña escolar binidero Colegio Nigel Matthew start cu un MAVO 3, mientras e otro scolnan di MAVO ta pasando den momento super dificil pa loke ta trata cantidad di alumno.

Tin pa añadi cu hasta un persona a keda eligi pa coordina y guia e departamento di MAVO. Kico ta su intencion tras di esaki? Cu kisas den un futuro cercano Colegio Nigel Matthew lo bira un scol di MAVO/HAVO? Ya tin cuater scol di MAVO na San Nicolas. Tin un resorta bou di DPS (Gen. Abraham de Veer School) na unda su persona ta e autoridad maximo, un resorta bou di SPCOA (John Wesley College) y dos resorta bou di SKOA (Colegio San Augustin y Filomena College Mavo).

Ta importante pa enfatisa cu durante e ultimo tres aña escolar e cantidad di alumno cu ta atende un scol di MAVO situa pariba di brug a conoce un caida y cu nan ta den un lucha continuo pa por haya alumno. E decision di e mandatario lo tin efecto negativo pa e cuater scolnan existente. Kico ta e punto di bista di e directivanan (SPCOA y SKOA), di e directornan y docentenan riba e decision aki? Kico ta e bentaha/desbentaha pa e alumnonan? E situacion aki lo trece mas incertidumbre ainda di loke ya ta reina bou di e mundo di enseñansa. Trempan of laat e scolnan lo sinti e efecto, pues nan no lo sa pa cuanto tempo mas nan por garantisa nan coexistencia, cu na su turno lo conduci cu e cuponan di trabou y of entrada di e educadornan lo disminui.

Considerando e presupuesto 2021 cu pronto lo keda trata den parlamento, na ningun momento e Minister di Enseñansa a incorpora e aspecto aki como un punto di prioridad pa atende cu ne den e aña calendario 2021.

Ta hopi imprudente di su banda cu a pesar cu su persona ta demisionario y cu e sa perfectamente cu solamente casonan coriente e ta permiti pa atende, toch el a opta pa haci otro. Kico ta su motibo real pa pusha e decision iracional aki na ultimo momento prome cu e baha como mandatario? Pa finalisa parlamentario Gunn a subraya cu e ta spera cu na bienestar di e cuater scolnan existente, e decision di e mandatario demisionario keda revoca manera a yega di sosode na algun ocasion caba.