Riba e caminda cu ta pasa dilanti di e edificio di Departamento di Impuesto (DIMP) na Camacuri, e automobilistanan por a mira of kisas por a observa e borchi di trafico cu ta indica cu no mag stop riba e caminda ey.
Ta un borchi cu ta indica un prohibicion completo pa stop riba e caminda ey. Segun vocero di Departamento di Impuesto, Meverly Romano, tin hopi cliente y hopi trafico tambe dilanti di e edificio.
Pero e automobilistanan ta staciona nan auto na rand di e caminda, di forma cu nan ta obstaculisa e fluho di trafico ey dilanti.
Esey cada biaha ta un situacion fastioso pasobra una bes cu tin auto staciona na e rand di e caminda, bo ta haya cu e ora eynan dos auto no por pasa mas banda di otro.
Eigenlijk e caminda ey ta un caminda di dos via, unda cu e tin cu keda liber pa trafico di tur dos direccion por trafica sin problema. Pero esaki semper tabata algo fastioso pasobra no por a prohibi ningun automobilista pa no staciona nan auto eynan, debi cu no tabata tin ningun borchi di trafico cu ta indica cu ta prohibi pa staciona auto eynan.
Awor aki, den cooperacion hopi bon mes cu Cuerpo di Polis, tambe SOGA, mirando cu SOGA ta doño di e edificio, pero tambe cu DOW, a logra yega na un acuerdo cu e borchi di trafico ta wordo poni e ora eynan na tur dos entrada di e caminda, unda cu e automobilistanan por ripara, nan por observa cu esaki ta un caminda, cu ta prohibi pa para y automaticamente ta prohibi pa staciona auto na rand di e caminda eynan.
Ta pidi pa e bishitantenan pa tene cuenta cu esaki, cu e caminda cu ta pasa dilanti di e edificio di Camacuri, mester keda na tur momento liber. Ta algo hopi importante pa siguridad.
Si acaso cu tin cualkier situacion di emergencia cu sea ambulance mester yega of polis mester yega rapido, no tin ningun obstaculo riba e caminda ey. Pesey tambe ta pidi bishitantenan pa tene cuenta cu esaki, cu e caminda awor aki a bira oficialmente cu no mag di para mes riba dje. Trafico tin cu sigui constante di tur dos direccion y automaticamente ta indica tambe cu no mag di staciona auto na rand di e caminda ey.
Mas cambio
Segun Romano, DIMP tin un plan total pa loke ta trata cambionan cu lo mester bay sosode rond di e edificio. Un di e cambionan ta tambe pa crea mas espacio di stacionamento pa personanan cu cierto deshabilidadnan.
Un handicapparking, pa personanan cu ta den rolstoel of cu tin cierto limitacionnan cu nan no por staciona leu, cu nan por haya toch un luga special pa nan pa parkeer mas cerca di e edificio. Esaki ta den planeamento awor aki.
Ta trahando hunto cu SOGA y DOW pa e mapa cu mester traha y pinta pa asina despues por realisa esakinan. E ta hopi importante. Tin plan tambe pa amplia e cantidad di espacio di stacionamento.
Awor aki ta ripara cu e parkinglot cu tin toch ta chikito, pasobra riba dianan cu ta hopi druk, no tin luga pa para auto. Tin poco tereno mas cu ta posibel pa habri mas parkeervak di forma cu mas auto lo por staciona, sin tin mester di staciona a lo loco rond, na canto di caminda of di tal forma cu e ta obstaculisa e trafico cu ta pasa ey banda.
E plannan aki, ta keda ehecuta manera cu ta completa. Tin di nan mester di un permiso special y ora tur cos ta cla, ta ehecuta e trabaonan. Durante aña ta pensa cu e bishitantenan lo por bay ripara cu e plannan aki lo ta realisa.
Ken lo ehecut’e
Debi cu SOGA ta doño di e edificio, e parkinglot ta wordo haci door di DOW pa e parti di pintamento di henter e tereno. DOW ta experto den e parti di e granduranan di e parkeervak, unda exactamente mester bay, unda mester bin parkeo pa vehiculonan di emergencia y unda mester bin parkeo pa personanan cu cierto limitacionnan.
Henter e plan aki ta encera diferente instancia cu tin cu traha hunto, prome cu e keda ehecuta.
