Fundacion Anti Droga Aruba (FADA) ta preocupa pa e situacion di hoben na Aruba. Esaki ta loke cu Rubiella Toppenberg, trahado preventivo di FADA, a trece dilanti den un conferencia di prensa diamars mainta.
No tin informacion nobo riba uzo y abuso di droga / alcohol na Aruba bou di hoben. Sin embargo FADA semper ta den contacto cu scolnan di Aruba.
Diariamente den e contactonan aki ta topa cu diferente problema cu hobennan ta enfrenta. Un di esunnan mas comun ta cu mucha y hoben nan auto estima (low esteem) ta hopi abou. E hobennan ta bataya continuamente cu nan problema di salud mental. “Nan ta biba bou di un presion enorme. Esaki ta algo cu nos ta topa diariamente. Hopi biaha e mesun presion aki ta pone cu nan ta bay uza algo pa calma loke nan ta sinti. Y hopi biaha e ta droga of alcohol.”
Den cuadro di e situacion ariba describi, ta importante e campañanan cu FADA ta hiba. Mayor y educadornan mester mustra riba e mensahenan cu ta bini dilanti den e campaña. E enfasis ta riba e motibonan pakico no mester uza ni droga ni alcohol y pakico busca ayudo ta sinti un desbalance den salud mental.
Banda di e dos problemanan ariba menciona, e funcionario di FADA no por keda sin menciona un malesa moderno bou di hoben cu ta “gaming disorder”. Algo no ta bay bon si un mucha of hoben por ehempel, ta lubida di baña, di come of cosnan basico di bida. ‘’E ora ta papia di un posibel problema. Si no trata e problema aki na tempo, e lo bay for di man.”
Por nota cu esaki a sali for di man na momento cu constata un desbalance den salud mental. “’Nan no kier tempo cu famia, nan kier ta nan so. Nan ta cuminsa isola nan mes. Esaki ta parti di un problema di salud mental.”
FADA ta mira un problema den e uzo excesivo rednan social y video gaming bou hoben. Nan cifranan di scol ta cuminsa baha. Ta mira dificil pa e hoben concentra na scol a causa di su adiccion cu ta conduci na problema di depresion y ansiedad. Esaki ta causa cu e no por concentra na e.o. scol. Y ta afecta e cifranan.
