Corte awe finalmente, despues di retraso di dos siman, a anuncia su veredicto den e caso cu Minister Rocco Tjon a pidi rectificacion di expresion haci pa dos periodista. Na inicio di e caso aki e dos periodistanan a pidi pa scucha dos testigo. Huevan de Leur sinembargo a dicidi di rechasa e peticion aki.
Hues a splica den su veredicto cu den e caso aki e ta basa su mes riba solamente loke a bini dilanti durante tratamento di e caso. Pues no por haci investigacion adicional y cu mester tene cuenta cu un procedura di kortgeding tin su limitacionnan. Hues ta bisa si cu loke Tjon a pidi ta un limitacion riba e derecho di expresion den Constitucion cu cada ciudadano tin, incluso Paskel y Andrade. Por limita esaki basa riba puntonan cu ta specifica den ley y cu esaki ta necesario den un estado di democracia. E ta menciona por ehempel, pa proteccion di e bon nomber of derecho di otronan, entre otro den e caso aki di Tjon.
Na final e Hues a ordena pa e dos periodistanan pasa durante e programa di Enfoke un rectificacion.
E rectificacion di Paskel ta bisa lo siguiente: “Den e edicionnan di Enfoke di 1 augustus 2023, 2 augustus 2023, 3 augustus 2023 y 7 augustus 2023, transmiti riba via canal di radio ‘Bo Guia 88.9 FM’ y comparti live ariba e pagina di Facebook y kanal di Youtube di 24Ora.com, mi persona, Patrick Paskel, a publicamente haci algun declaracion c.q. acusacionnan serio den direccion di señor Rocco Tjon como persona y como minister di Husticia y Asuntonan Social di Aruba, como señor Rocco Tjon como (inspector di) polis lo tabata envolvi den un caso interno di Cuerpo Policial di Aruba unda cu e lo a tuma placa pa informacion of pa cambia proces-verbalnan of rapport di polis, pa cual motibo señor Rocco Tjon lo tabata aresta y a wordo scucha como sospechoso na Landsrecherche y e orden pa su detencion (‘inverzekeringstelling’) lo tabata cla.
Por medio di esaki, mi persona, Patrick Paskel, ta declara cu mi no tin prueba pa e declaracionnan c.q. acusacionnan ta berdad, y p’esey e contenido di e declaracionnan c.q. acusacionnan ta innecesariamente ofensivo y insultante pa señor Rocco Tjon como persona y como minister.”; “Den e edicionnan di Enfoke di 2 augustus 2023 y 3 augustus 2023, transmiti riba via canal di radio ‘Bo Guia 88.9 FM’ y comparti live ariba e pagina di Facebook y canal di Youtube di 240ra.com, mi persona, Nelson (‘Speed’) Andrade, a publicamente haci algun declaracion c.q. acusacionnan serio den direccion di señor Rocco Tjon como persona y como minister di Husticia y Asuntonan Social di Aruba, como señor Rocco Tjon tabata un sospechoso den mas cu un caso y cu como (inspector di) polis lo tabata envolvi den un caso unda cu e lo a tuma placa pa cambia proces-verbalnan of rapport di polis. Por medio di esaki, mi persona, Nelson (‘Speed’) Andrade, ta declara cu mi no tin prueba pa e declaracionnan c.q. acusacionnan ta berdad, y p’esey e contenido di e declaracionnan c.q. acusacionnan ta innecesariamente ofensivo y insultante pa señor Rocco Tjon como persona y como minister.”;
Di biaha Paskel y Andrade a informa ta studiando kico ta e siguiente paso pa mira pa trece e berdad dilanti.
Pa relato amplio lesa TREMPAN.
