Diaranson anochi a tuma luga e North Sunset Parade. Compara cu aña pasa, e parada tabata uno chikito, pero asina mes esunnan cu tabata presente tanto aden como na banda a sa di pasa un momento agradabel.
Darren van Ommeren, presidente di SMAC, a indica cu durante e parada tabatin un brassband, Flow Music steelband y Youth Xtreme. Dilanti di Youth Xtreme tabata haya e bario di Sero’i Janchi cu algun miembro, mientras cu patras e publico por a join.
Hopi grupo no a forma parti di esaki. Segun van Ommeren, e tempo a hacie dificil pa e gruponan por a forma na tur parada.
E parada, cu tabata dirigi pa polis como e organisadonan di e parada y SMAC, a cuminsa riba e musica di Quality Brassband. Su tras e grupo di steelband Noord Flow Music tambe a sa di pone ambiente pa esunnan presente. E Grupo ParaLoco 3.0, cu ta existi desde 1980, a gosa e parada riba e musica di steelband. Den dos dia nan a prepara tur cos pa asina forma parti di North Sunset Parade. E grupo aki ta generacion tres, pero tur cos a cuminsa na Paradera cu e grupo di Hoffi Prikichi y otro grupo loco mas.
E banda musical cu a pone tur hende disfruta di e canticanan di carnaval tabata Youth Xtreme. Nan a acompaña e reinanan Grandi y Sra. North Sunset Parade. Tambe esunnan para na banda tambe bula den e last lap.
