Wilhelmina Kanker Fonds a anuncia nan campaña pa colecta placa riba caya. Esaki ta e di 57 campaña anual, cual nan ta haciendo for di 1961, tempo cu e fundacion a lanta. Diasabra awo y tur e diasabranan te cu dia 12 di Mei, KWF lo bay tin e campaña pa colecta riba caya. Sra. Lilly Prince, a expresa cu Wilhelmina Fonds semper ta gradici Dios y Comunidad Arubano pa e sosten cu nan ta haya, pa asina por traha y yuda e pashentnan cu ta atravesando den problemanan di salud y cu nan tin mester di un sosten. KWF tey pa nan.
E relato financiero cu tin pa e comunidad Arubano ta, cu financieramente aña 2017 no tabata un bon aña pa KWF. Apesar cu gastonan total a baha cu 13%, compara cu 2016, e entradanan tambe a baha. Ora nan sali colecta riba caya por bisa cu e aña pasa no a bay bon. E donacionnan no tabata bin manera antes mas. E entrada a cay cu 37%, compara cu 2016.
KWF ta conta riba donacion, colecta y actividadnan di recaudacion di fondo pa por financia e gastonan cu ta presenta pa por yuda comunidad.
A nota un caida den donacion y principalmente tabata tin riba aña 2017, cu a haci un impacto hopi grandi. Na aña 2017, Wilhelmina fonds a ricibi 267.437,72 na actividadnan menciona. Wilhelminafonds ta gradici hopi persona den nos comunidad, compania y boluntarionan, cu a aporta pa yuda Wilhelminafonds durante e aña. Manera menciona, e gastonan total a baha cu 13% na 2017, compara cu 2016. En total e gastonan tabata 354.667,96, di cual e gasto mas grandi ta keda e cuido na cas (thuiszorg). Esaki ta pa e pashentnan cu ta terminal. E gasto di thuiszorg a baha toch asina mes cu 32%, compara cu 2016, pero ainda e ta forma un 37.5% di tur e gastonan anual.
E gastonan di thuiszorg a baha pa motibo di un maneho mas estricto den e parti aki. Wilhelminafonds su otro gastonan grandi pa 2017 tabata 16%, na protese y articulonan.
E ayudonan (hulpverlening) y e proyecto di transporte, total tabata 13.5% di e gastonan anual. Manera tur aña, KWF ta sigui focus riba programa di prevencion via informacionnan educacional. Bao di esaki por compronde tambe cu ta forma e charla y propagandanan den medionan social. Esaki ta yega na un total di 12.5% di e gastonan, aunke aña pasa, Wilhelminafonds no tabata tin e gastonan di rifa pa 2016, a finalisa den 2017. E gastonan cu mester a paga na 2016, na comienso di 2017, a paga eseynan. Consecuentemente esaki a hisa e gastonan den 2017 cu 8%. Gastonan pa organisa fundraising tabata un total di 3% y e gastonan pa draai e oficina den Spinozastraat, manera loke cu tin mester manera e articulonan cu tin mester, e gastonan tambe di awa y coriente y telefon, esaki ta bay na un 9.5%.
Tur e gastonan aki ta haci’e y comunidad sa hopi cla cu e trabao cu KWF ta desplega den e comunidad aki, e ta bay door di voluntarionan. Den oficina ta voluntario so ta traha. Mayoria ta pensionado y esnan cu ta den directiva practicamente tur ta traha, menos Lily Prince mes, kende semper ta wordo paga pa no traha, pasobra pa hopi aña caba e ta cu pensioen. Pero e gastonan aki ta subi enormemente y tin e rifa cu hopi hende a cumpra, pero e rifa no ta bayendo bon. Esey a pone cu awor aki oficialmente Prince a anuncia na comunidad cu e rifa lo hala pa dia 2 di September, riba un diadomingo. Ta spera cu den trayectoria di e lunanan aki cu tin, ta subi caya y bende e rifa y ta cuminsa diasabra awo tambe cu nan campaña pa colecta, ta spera cu asina ey lo por haya e fondonan pa por traha durante 2018. E gastonan ta sumamente halto, pero ta haci nan best pasobra e pueblo no lo lage na caya.
Ta gradici Dios y tambe tur miembro di prensa cu durante tur e añanan aki ta para tras di KWF, na comunidad Arubano, un pa un y ta tene hopi na cuenta na e personanan cu e malesa ta toca na nan porta. Hopi biaha, tanten cu e no bati na bo porta, bo no sa e dolor cu e tin y e dolor cu e ta lagabo, no pa un, ni dos dia. Sino pa un paar di aña. Pero pesey ta keda enfoca riba dje, cuida bo salud. Wak den bo cura di cas. Wak kico ta e malesa cu por tin cu por ta bo antepasadonan a fayece di dje. Papia di dje. Pero wak esey y sea conciente, consulta cu bo dokter.
