Diamars atardi alrededor di 3:30 pm a sosode un accidente n’e crusada di Palm Beach na altura di CMB. Esaki ta un di e tantisimo accidentenan cu ta sosode n’e crusada aki. Semanalmente polis y personal di Forensys ta presenta na dicho crusada pa atende cu desgracia. Awe no tabata un excepcion. Manera semper, falt’i preferencia ta keda hung’un rol grandi.
Ta trata di un auto marca Ford modelo Edge color blanco, numera A-10592 y un Hyundai modelo Getz color shinishi, numera A-44054. Tin tur indicacion cu e Getz tabata bayendo direccion di Palm Beach y e Edge a lora su dilanti sin duna preferencia. Investigacion lo saca afo con exactamente e accidente a tuma luga. Daño material tabata basta.
Den e Edge tabatin algun mucha cu a keda den un spanto debi na e impacto, ambulance a presenta pa check un cu e otro cu e muchanan y tambe na esunnan cu a resulta levemente herida. No tabata necesario pa transporta ningun hende pa hospital, na sitio mes a atende cu nan.
