E asunto di atraco tin basta hende spanta. E atracadornan ta drenta arma y no solamente ta bay riba e caha di placa den negoshi, pero tambe ta atraca e clientenan den negoshinan.
Esaki tabata e caso den diferente atraco. Tres atraco arma a tuma lugar den menos cu 24 ora di tempo. Polisnan ta sali busca rond y acumula mas informacion posibel. Mientrastanto e mesun atraconan aki ta causa tambe cu basta negoshi tin trahadornan laborando cu miedo. Ora di sera negoshi ta yama Polis pa presenta pasobra tin movecionnan straño. Polisnan dimes ta yega mesora y asina papia cu e trahadornan y duna nan un sentido di seguridad ora cu nan ta prepara pa bay nan cas anochi. Mester bisa cu e trabounan di Cuerpo Policial ta continua y atraco team ta haciendo tur esfuerzo pa pone man riba e grupo di hoben local cu ta cometiendo e atraconan.
