Aruba Airport Authority N.V. (AAA) a ricibi e grato noticia e siman aki for di un di su partnernan di mas grandi den operacion di buelonan for di Merca, esta American Airlines. A anuncia cu lo cuminsa opera un buelo directo semanal for di La Guardia Airport. E vuelo lo start dia 8 di Juni 2019 y ta cuminsa bende pasashi desde otro siman dia 8 di October di e aña aki.
American Airlines ta un di e aerolineanan mas grandi den operacion di Aeropuerto di Aruba, alrededor di 18% cu buelonan directo for di Aruba pa Miami, Philadelphia y Charlotte. American Airlines tambe lo opera buelonan semanal directo for di Dallas, Texas y Chicago, Illinois desde 22 december 2018 manera anuncia anteriormente. Awo cu e extra buelo aki for di La Guardia, American Airlines lo bolbe tin un presencia den area di New York cu buelonan directo pa Aruba.
E buelonan pa Aruba lo wordo haci cu avionnan tipo Boeing 737-800 di 160 asiento. E schedule di buelo ta consisti di buelonan anual pa y for di La Guardia pa Aruba riba cada Diasabra.
Chief Commercial Officer di Aruba Airport Authority, Barbara Brown, ta hopi contento cu e anuncio aki di American Airlines: “E noticia aki ta fantastico! American Airlines semper a mustra di ta un partner grandi y leal pa Aeropuerto di Aruba pa hopi aña y e servicio adicional aki ta prueba di un relacion duradero y creciente. Conexion pa nos isla ta esencial pa nos industria di turismo y nos ta yama e servicio nobo aki bonbini cu brasanan habri! Nos ta cla pa brinda e servicio aki na e pasaheronan y lo ta en espera di un celebracion inaugural otro aña”. AAA ta gradici tambe pa e colaboracion continuo entre tur e stakeholdernan local manera ATA, AHATA y Ministerio di Turismo, Salubridad y Deporte pa cu e logronan aki.
American Airlines ta ofrece un averahe di casi 6,700 buelo diario pa 350 destinacion den 50 pais. E aerolinea ta un miembro fundado di e oneworld®️ alliance, cu su miembronan ta ofrece casi 14,250 buelo diario na 1,000 destinacion den 150 pais.
