Un rato pasa pa 7:30pm a activa polisnan di diferente districto pa yega cu urgencia na e adres Pos Chikito # 8, cerca di Casa Cuna. E prome unidad di polis cu a yega na e sitio a constata cu tabatin un señora hopi altera y spanta, pasobra atracadonan a mar’e lag’e atras den camber di su cas.
Polis a compronde cu tabata dos hende homber, ambos cu arma di candela den nan man, probablemente Latino, pasobra a papia Spaño cu e victima, a mara e señora den cas y bay cu su celular. Autoridadnan tin e area cera pa investigacion. A pidi presencia di ambulance na e sitio pasobra e señora no ta sinti bon y e ta sufri di presion halto.
Cualkier persona cu por sa mas informacion, of por a mira movecionnan straño den e area di Pos Chikito, por informa polis mesora via 100. Ta sospecha cu e atracadonan a scapa den un auto probablemente marca Daewoo color blanco.
Kico nan a bay cu ne for di e cas ainda no ta conoci. Polis ta calmando e victima prome pa despues purba saca for di dje kico e dos hombernan a horta for di dje, bou menasa cu arma di candela.
