Awe merdia a tuma luga introduccion oficial di e Comision di Abuso Sexual di Menor. Lisette Gomes ta presidente di e comision aki, cu ta cay directamente bao di prome minister Evelyn Wever-Croes.
Na november 2019, a sinta cu prome minister riba e tematica di abuso sexual di mucha, cual ta sigui preocupante den comunidad. A bin cu e idea pa lanta e comision aki pa asina por haci algun investigacion y na final di investigacion cu ta haciendo por duna conseho na Gobierno.
Desde juni e comision ta sintando hunto, haciendo cierto reunionnan cu stakeholdernan cu ta hopi importante pa e tematica aki.
Despues di tur e reunionnan a dicidi cuminsa haci uni nvestigacion nacional. Esaki ta nifica cu ta bay sinta cu no menos cu 150 persona, entre otro mayor, educador, dokter, psicologo.
Di parti di husticia lo sinta cu Jeugd en Zedenpolitie y ministerio publico y tambe cu Corte di Husticia.
Den pasado tabata tin cierto investigacionnan cu a tuma luga na Aruba y esaki ta bay un tiki mas leu, pa por fortifica e parti di cuido, e parti represivo, na momento cu casonan bin dilanti.
Esaki ta pa entre otro yuda e mucha pa e por haya su tratamentonan manera mester ta, pero tambe e parti hudicial, pa asina e pasonan por cana mas nechi, investigacionnan por bay miho, pa asina por mira mas castigo.
A cuminsa ayera oficialmente cu nan investigacion, cual lo dura mas of menos un luna. Ayera a sinta cu psicologonan priva, como tambe trahadonan social, cual a bay tremendamente bon.
Gomes ta contento cu e cooperacion cu nan ta ricibi di e profesionalnan. Kier a pidi si cu na e momento cu ta haya un email, laga sa si por participa, pa por sigui busca mas profesional pa yuda den e parti aki di e investigacion.
Tambe si mayor, educador, profesional ta interesa pa participa na e investigacion aki, por tuma contacto cu Lisette Gomes na 5639820 y lo percura pa haya invitacion oficial y tur e detayenan cu ta bin su tras.
