Cu suma placer y honor ta anuncia e incorporacion oficial (statuto) di organisacion CUSA, Caribbean Umpires and Scorers Association. Dia28 di october 2022, pa 3:00 pm na oficina di Notario Helmeyer a realisa e firmamento oficial dje statuto pa asina legalisa e organisacion.
CUSA su directiva ta consisti di e siguiente persona nan manera; presidente Edson Louisa, tesorero Carlos Benjamin y secretario Rolando Halman. Otro miembro di directiva ta Francis Maduto, Giovanni Muelens y Elvis Mayers. CUSA su nomber anteriormente tabata AUSA (Aruba Umpires and Scorers Association) un movemento cu a inicia un algun aña pasa, ora un grupo di Umpires a bini hunto cu e meta y intencion pa establece un guia pa Umpires y Scorers y pa fortalece e nivel di nan.
A haci esey pa mehora nan habilidad pa ta un miho Umpire y Scorer pa e weganan di baseball y softball en general. Eventualmente e organisacion a mester cambia su nomber di AUSA pa CUSA pa asina refleha nan interes, afiliacion y miembresia Internacional.
E obhetivo di e organisacion ta pa promove, proteha, curasha, educa y motiva e miembronan y pa atrae miembro nobo pa bira Umpires y/o Scorers. Ta felicita y desea CUSA tur clase di exito. Na januari 2023 e organisacion lo tene su prome reunion anual. Pa mas informacion acudi na nos pagina di facebook of manda nos un e-mail [email protected]
