Aruparking ta un di e fastballnan mas grandi cu Otmar Oduber, e spindoctor, a pasa e gobierno di AVP mes durante gobernacion anterior. Parlamentario Arthur Dowers ta un di esnan cu a bringa hopi duro contra e binimento di Aruparking, na e forma cu el a bin y e abuso cu a wordo haci contra nos pueblo.
A mira e tempo aya un colega, kende ta forma parti di e Gobierno, e ta esun cu kier a hinca su amigonan politico den e departamento despues di hunga tur triki cu tabata tin, el a mira como esaki como e ultimo intento pa nombra su campañadornan. No tabata worry cu sentimento di hende y a sali duro cuminsa klem auto di hende, castiga hende. Esey ta algo cu a bisa cu nunca mester a pasa asina ki. Ora cu a bin presion di tur banda, ta Glenbert Croes di MEP y otronan a bisa cu lo kita e Aruparking pasobra e no ta un proyecto bon, na momento cu nan bin den gobierno. E no a wordo introduci bon. El a wordo carga pa un Arubus y e mes tabata den un posicion no fuerte financieramente. E proyecto ta di Arubus y Arubus mester a sostene e proyecto aki. E storia cu Otmar a bende, ta cu e lo genera hopi placa pa scapa Arubus. Siendo cu e calculacion tabata cu esey no ta berdad. No ta straño cu Arubus ta pasando den e problemanan aki segun parlamentario Arthur Dowers. Basa riba presion di partido MEP mes cu no ta haya necesario e proyecto aki, funciona na e forma cu e tabata funciona, esta mester reduci e oranan cu ta cobra, para klemmento di auto, mester kita e proyecto aki, e control den cierto areanan di caya grandi, ta buta cu e proyecto a haya menos entrada ainda.
Eliminacion di Aruparking
MEP a bisa cu prome dia den gobierno nan lo elimina Aruparking. A sali for di e punto di bista, cu by now, no lo tabata tin Aruparking mas. Por ta lo a keda cu e Parkeerwachternan pa parkeo fout, pero lo a reduci e gastonan considerablemente. E ora ey lo por a mantene e proyecto ainda. Awor aki loke ta wordo haci ta iresponsabel segun Dowers. Tambe e ta bay pone mas presion y lo sali bisa cu Arubus tambe ta den un crisis. Ta un crisis cu nan mes a pidi pe, cu nan mes a crea. Ta spera cu pueblo mester ta conciente cu loke nan tabata bisa no tabata sali for di un expresion conciente. Simplemente nan ta mira unda cu bo por haya un hende cu por ta rabia riba algo, ban fomenta mas discordia, ban stimula mas rabia. Kier yega na poder. Y awor cu ta na poder, nan no por deal cu hendenan cu nan a pone rabia e tempo ey. Awor nan no por deal cu hendenan cu a haci promesa cun’e. Tabata tin un señora hasta cu a wordo saca na garganta pasobra a campaña y a bay busca su bevordering segun Dowers di AVP.
E señora a bisa cu a priminti’e pa haya un bevordering. Minister a bise di esey y logicamente e señora a bin pidi su bevordering y awo nan ta core scondi cu e promesanan cu nan a haci ora yega na poder. Ta e sistema di politica anticua. No por sigui politica di kauchi baulo. Tempo a cambia. Bo lo wordo afgerekend y lo wordo castiga pa esaki. Lo keda pendiente di e siguiente etapa di mal gobernacion di e partidonan cu ta na poder na e momentonan aki.
