Resientemente Minister di Enseñansa, Siensia, Kultura i Deporte, sra. M. Alcalá- Wallé huntu ku Minister di Desaroyo Sosial, Labor i Bienestar, Sr. H. Koeiman a reuní huntu ku nan Ministerionan i sra. G. van Lieshout pa atendé e trayekto di “werkend leren &“leerwerktrajecten”.
E idea ta pa yega na modalidatnan pa forma nos hendenan mas mihó posibel pa merkado laboral pero tambe pa nan tin un formashon ku nan ta haña un kalifikashon pe. E dos ministernan aki ta sinkronisá e trayektonan aki pa por garantisá ku mas hende ta haña trabou despues di nan estudio i pa merkado laboral haña e personanan apropiá. Na e momento aki tin un défisit entre lokual enseñansa ta produsí i e lokual merkado laboral ta ofresé. Trahando konhuntamente e ministerionan ta yega na akuerdonan kaminda e sektor di enseñansa i di labor ta konektá ku e merkado laboral pa asina por kumpli hustamente ku nesesidatnan di esaki. Di e forma aki ta prepará nos suidadanonan mas dirigí posibel pa asina por garantisá un mihó merkado laboral.
