Director di Douane ta calcula cu e trafico di Venezuela a cay, pa motibo di e situacion eynan. Sindicato SADA ta na altura di esey. Segun presidente di e sindicato, Edward Maduro, a splica cu nan ta wordo teni na altura di tur loke ta sosode den tur e departamentonan di Douane. E coleganan en berdad a informa e sindicato pa loke ta e trabaonan cu a drop hopi, mirando cu a bin restriccion mas pisa pa loke ta salida di e barconan for di Venezuela.
Maduro ta lamenta esey. Siman pasa por a nota den medio di prensa, cu un biaha mas a bin haya un boto bandona na altura di Santana di Cacho, unda cu posiblemente hendenan lo a drenta ilegalmente, subi tera, y tin di compronde hasta cu cosnan ilicito a keda haya.
Eynan ta falta di maneho, falta di tuma decisionnan cual ta yuda e pais. No ta solamente placa ta yuda e pais. Mester cera e fronteranan tambe, pa evita cosnan ilegal drenta y subi nos pais. Pa loke ta droga, arma, medicina. Ta Hopi cos ilegal por drenta Aruba, cual por tin efectonan negativo. Ki bal bo tin un economia cu ta draai, pero bo pais ta yena cu arma y droga, pasobra no tin control na frontera. Por a scucha tambe sr. Kirindongo di Kustwacht, unda cu e mes ta bisa cu nan no por ta tur caminda. Ta pa e motibo ey, ta den team tin cu traha. Tin cu bin cu un team di douane, polis, kustwacht, unda cu por ehempel kustwacht ta na costa norte, tin polis ta na costa zuid. Douane na un otro punto. Tin cu traha simultaneamente hunto pa cera bo frontera.
